Ontmoet Umsobomvu se sanitasiespan
Basie Piek COLESBERG — Wanneer ons in die media kennis neem van gebrekkige dienslewering in sommige munisipaliteite, wonder ons baie keer hoe lyk dit plaaslik. Daar was in die verlede baie negatiewe beriggewing in hierdie verband, maar die afgelope meer as ‘n jaar blyk daar nie veel probleme te wees nie. Aangesien die sanitasie-afdeling deel is van die dienslewering het ek bietjie gaan kers opsteek by die verantwoordelike amptenare. Wie is hierdie mense? Ken die gemeenskap die betrokkenes? Hulle is betrokke by die suiweringsaanleg van rou materiaal. Die toesighouer is Charlie Douglas. Hy is ‘n boorling van Fort-beaufort en het reeds in 2009 hier diens aanvaar. Hy word bygestaan deur twee operateurs, Freek Pieterse en Stoffel Pylman. Beide is afkomstig van Colesberg en het onderskeidelik in 2002 en 2009 hier begin werk. Al drie het indiensopleiding by Seta ontvang. Hulle bedien grotendeels Colesberg-woonbuurte, maar word ook op Norvalspont en Noupoort aangewend sou hulle daar benodig word. Tans hanteer hierdie groep nege riooldamme in al die fasette van suiwering. Dan het hulle ook vir Alfred van Niekerk wat die trok bestuur wat suigputte diens. As in ag geneem word dat daar 270 suigputte is wat gediens moet word, is dit ‘n enorme taak. Charlie verseker my dat daar geen rou riool tans van die damme in die Colesbergsloot beland nie en dat water veilig is. Dit is duidelik dat hulle besef dat inwoners se gesondheid van hierdie kwesbare afdeling afhanklik is. Aangesien dit redelik goed gaan in Colesberg en die feit dat hierdie mense nie altyd erkenning ontvang vir hul werk nie, wil ons dan op hierdie wyse vir hulle dankie sê vir hul bydrae tot gesonde dienslewering.