92 jagters kompeteer vir pryse
GRAAFF-REINET — Op Vrydag, 18 Mei, het Huis Cronje - Hoër Volkskool se koshuis - in samewerking met die hoofborg van die dag, Wild Outdoors Graaff-reinet, vir die vyfde agtereenvolgende jaar ‘n baie suksesvolle springbokjagkompetisie aangebied.
Dié jaar is alle oorwagtinge oortref en het 23 spanne - wat elk uit vier jagters bestaan hieraan deelgeneem.
Vroegoggend het al die deelnemende jagters by Hoër Volkskool se 'Volksie' bymekaar gekom waar die hooforganiseerder van die dag, Tokkels Lombard, al die reëls aan hulle verduidelik het.
Hierna het die jagter die onderskeie plase getrek waar hulle vir die dag sou gaan jag. Elke jagter kon twee springbokke skiet. Die jagters moes, in 'n bestek van vier ure, probeer om hul kwota bokke te skiet, waarna hul moes terugkeer na die Volksie toe vir die beoordeling van die bokke en skote.
Hier is daar gekyk na skootplasing, gewig en lengte van die horings onder andere om die wenners te bepaal.
Fantastiese pryse, vir spanne, asook individue, was op die spel.
Die span wat die eerste plek behaal het, het bestaan uit Hendrik Wolfaardt, Phlippie Wolfaardt, Jaco Potgieter en Pieter Nel (jr).
Jan Nel, Morne Marx, Johan Lategan en Roche van Heerden het die tweede plek verower met die span bestaande uit Dave Stern, William Coperman, Richard Collett en Jason Jacobs in die derde plek.
Die dag se individuele wenners was (eerste) Phlippie Wolfaardt, (tweede) Jaco Potgieter en (derde) Johan Lategan.
Die beste skoot van die dag is afgevuur deur Johan Kriegel, met Jackie Laubsher wat die bok met die langste horings geskiet het sowel as die swaarste bok vir die dag op Arno de Jager se plaas Arcadia geskiet het.
Na afloop van die prysuitdeling, is daar heerlik om die braaivleisvure gekuier en is die jagters getrakteer met heerlike kos. Almal het die dag terdeë geniet.
Die koshuiskomitee van Huis Cronje bedank al die borge. ‘n Spesiale woord van dank word gerig aan Marius van der Westhuizen van Wild Outdoors Graaffreinet vir die ruim en getroue borgskap die afgelope vyf jaar.
Nóg 'n groot kontantborg van dié jaar se kompetisie was Sovereign Foods wat klaar onderneem het om weer in te tree as borg volgende jaar.
Daar is ook groot nuus vir die boere by wie daar volgende jaar gejag gaan word
- by 2019 se kompetisie gaan nie net die individuele jagter wat die eerste plek wen 'n geweer as prys ontvang nie, maar ook die boer op wie se plaas die wenspan gejag het.
Inskrywings vir 2019 se kompetisie kan reeds bespreek word by vriespoort@gmail. com