Optelgoed is hougoed
Daar is twee dae in jou lewe wat jy altyd sal onthou: jou eerste en jou laaste dag van skool.
Alhoewel vir menige slegs 'n vae herinnering, was die eerste dag van skool vir party mense 'n trauma in die kleine, vir ander die eerste opwindende tree in 'n groter wêreld.
Die laaste dag, wat verlede week vir Graaff-reinet se matrieks aangebreek het - word onthou vir die uitbundigheid daarvan, soos verlede week toe Hoër Volkskool se matrieks hul gebruiklike poetse op die skool se onderwysers gepak het, of toe Union se Graad 12-leerders die nuwe eeufeesklok wat by die skool aangebring is individueel onder luide applous gelui het om hul skoolloopbaan daar af te sluit.
Beide is ‘n mooi tradisie wat hierdie jongmense die res van hul lewens sal bybly.
My laaste matriekdag se jolyt was in twee dinge gesetel.
Daar sou geen skoolklok meer wees nie - daardie skril klank sou nooit weer "my lewe regeer nie". Maar belangriker selfs, geen meer haarreëls sou vir my geld nie.
Dit was die dag toe ek die stof van 12 jaar op die skoolbanke finaal afgeskud het.
Die opwinding was egter van korte duur en het die werklikheid vinnig ingeskop... die res van my lewe het amptelik begin.
En dis waar die afgelope 12 jaar ingepas het.
Dit is daardie vormingsjare waardeur elke jongmens moet worstel, en waar mense op elkeen se pad geplaas word om te help on hom of haar te vorm en te lei om hopelik die mens te word wat die Here in gedagte gehad het.
Wanneer ons terugkyk, besef ons dat niks ooit toevallig was nie.
Dat alles waarmee ons gekonfronteer is, uitdagings, moeilike keuses, puberteit, akademie en soms net simpel mense, alles deel is van ‘n baie groter plan en dat die werklike uitdaging nou voorlê.
Mag jou skooljare, en veral die laaste vyf, jou altyd bybly, en mag jy put uit die ervaringe wat jy in hierdie tyd beleef het.
Leef elke dag so dat jy saans jou kop kan neerlê met die wete dat jy nie vandag teleurgestel het nie.
Leef so dat jy jou ouers verstom met jou selfstandigheid, sin vir verantwoordelikheid en lewenslus, dat jy hul harte sal vul met dankbaarheid dat hulle so bevoorreg is om juis JOU ouers te wees.
Leef so dat jy met trots kan verkondig waar jy vandaan kom, waaruit jy jou krag elke dag put, en dat almal om jou soos jy wil leef.
Ek is seker dat die dorp se hoërskole hul matrikulante die jaar met groot verwagtinge groet.
Aan vanjaar se Graaff-reinet matrieks: Onthou hierdie dae, geniet elke oomblik en koester jul vriendskappe. Sterkte met die eksamen. En bestuur om hemelsnaam versigtig.