Spelers se talent geslyp
Met die oog op die ontwikkeling van hokkie as spel in die platteland, het die Karoo Hokkieskool van Ina Botha voor-verlede naweek, 5 en 6
Oktober, 'n hokkiekliniek op Graaffreinet aangebied.
Negentig leerders, van so ver as Kimberley, het met tonne entoesiasme en afwagting by Union High se Astrobaan hiervoor opgedaag.
Die kliniek se hoofdoel was om elke deelnemer se hokkievaardighede te verbeter, met verskeie nasionale en provinsiale hokkiespelers wat as afrigters opgetree het om die verskillende tegnieke en idees onder die spelers te deel asook om ‘n passie vir dié sport onder die leerlinge te kweek.
Jonelke Swanepoel, 'n O.21 Proteaspeler, wat veral in verdediging uitblink, het die leerders verskeie verdedigingstegnieke gewys sowel as haar befaamde "fake slap".
Proteaspeler Cornelle Holtzhausen ('n nooi Botha) het ontwyktegnieke en doelskiet met die leerders geoefen.
Die hoogtepunt van die kliniek was egter die wedstryd aan die einde van die tweede dag, waar die beste spelers van die toernooi saam met die afrigters 'n wedstryd gespeel het. Diegene wat nie aan die wedstryd deelgeneem het nie, kon toekyk hoe die nuut aangeleerde tegnieke en vaardighede toegepas word en Holtzhausen en Swanepoel in aksie beleef. Die Karoo Hokkieskool beplan om dié tipe kliniek jaarliks aan te bied om sodoende die plattelandse leerders die geleentheid te bied om hul vaardighede te verbeter.