Tennistoernooi lok talle spelers van oral
ONGELOOFLIK! Dít is hoe deelnemers aan die Matchpoint Tennisakademie se vyfde jaarlikse 'Classic'-tennistoernooi, dié kompetisie beskryf het.
Die tennistoernooi, wat vroeër die maand in Graaff-reinet plaasgevind het, was volgens Pienaar ’n reuse-sukses. 'n Allemintige 120 spelers het die tipiese Graaff-reinet hitte oor die naweek van 5 en 6 Oktober aangedurf om in verskillende ouderdomsgroepe van O.8 tot die Ope-afdeling in enkel- sowel as dubbelwedstryde mee te ding.
Heelwat plaaslike spelers het deelgeneem, asook spelers van Port Elizabeth, Bloemfontein, Cradock, De Aar, Middelburg, Somersetoos, Bedford, Oos-londen, Burgersdorp en Colesberg onder andere.
Soos oudergewoonte, was uiters kompeterende spel aan die orde van die dag en is daar in elke ouderdomsgroep 'n wenner en 'n naaswenner aangewys wat almal beloon is met uitstekende pryse.
Die spelers van Graaff-reinet het baie goed gevaar, veral die spelers verbonde aan die Matchpoint Tennisakademie.
Een van die beste pryse op die spel - 'n splinternuwe Wilson-tennisraket ter waarde van R2 500 geborg deur die Matchpoint Tennisakademie - is deur 'n speler van Cradock Lehane Marais gewen.
Inalise du Piesanie van die Matchpoint Tennisakademie rig graag 'n woord van dank aan almal wat 'n hand bygesit het om die toernooi moontlik te maak, asook die Union-skole, Laer Volkskool, die Botaniese Tennisklub en Hoër Volkskool vir die gebruik van hul bane en fasiliteite.
Volgende naweek, 2 en 3 November, vind die Jocelyn Marais tennistoernooi vir laerskole in Graaff-reinet plaas - dié toernooi is seker die grootste en mees belangrikste naweek op die Matcpoint Tennisakademie se kalender.
Dan bied die Matchpoint Tennisakademie weer 'n tenniskliniek aan op 26, 27 en 28 November in Graaff-reinet. Belangstellendes kan Hannelie Pienaar skakel by 072 686 1804 in verband hiermee.