Munisipaliteit trap korrupsie vas: Valke se hulp ingeroep
Die bestuur van die Dr Beyers Naudémunisipaliteit het Woensdagmiddag, 31 Oktober, 'n verslag en ondersteunende dokumentasie aan die spesiale handelsmisdaad-ondersoekeenheid van die polisie, die Valke, vir verdere ondersoek en vervolging oorhandig.
Dit volg nadat die munisipaliteit vroeër vanjaar 'n forensiese ondersoek van stapel gestuur het, waar, onder andere, ongerymdhede in die bedrywighede van die munisipaliteit se voorsieningskettingbestuur-afdeling, onder die soeklig geplaas is.
Volgens die burgemeester Deon de Vos is daar tydens dié ondersoek bewyse van finansiële wanbestuur en verkwisting van openbare fondse, in dié departement gevind en het hulle besluit om die Valke te betrek sodat daar 'n kriminele ondersoek van stapel gestuur kan word.
Munisipale amptenare sowel as privaat sakeondernemings word volgens die ondersoek se bevindinge by die beweerde korrupsie betrek.
"Korrupsie is ’n strop om elke inwoner van die land se nek wat elkeen van ons stadig maar seker die afgrond aftrek en versmoor. Ons sien daagliks hoe korrupsie Suid-afrikaanse burgers verarm," meen burgemeester de Vos. "Die tyd het aangebreek dat ons strewe na ’n infrastruktuur van integriteit ’n werklikheid word."
De Vos het verder gemeld dat munisipale hoës voorts te werk sal gaan om te sorg dat almal binne die munisipaliteit saam sal staan teen korrupsie.
“Ons boodskap aan korrupte lede van die munisipaliteit is dat ons op jul spoor is en dat daar nêrens vir julle plek is om weg te kruip nie. Op dié manier wil ons korrupsie uitroei en vooruitgang in die munisipale distrik verseker,” het hy gesê.