Avonturiers pak langpad
Die pas afgelope naweek het #karoochallenge, wat tot dusver slegs veldwedlope aangebied het, hul eerste en beslis nie die laaste, avontuur motorfietsrit aangebied.
Motorfietsryers van Graaff-reinet, nabygeleë dorpe soos Cradock, Murraysburg, Middelburg en Port-elizabeth, en selfs van so ver as Carnarvon, het deelgeneem.
Die groep avonturiers het vroegoggend op Saterdag, 10 November, vanaf Reinet Manor buite Graaff-reinet vertrek om die Camdeboo te verken. Hier het hulle 'n russtop gehad op die plaas Bothashoop, en die Mercedez Benz-versameling van eienaar Paul Merrifield bewonder.
Van Bothashoop het hulle met verskillende vlakke van haastigheid vetrek om die Kendrew-paaie te verken en middagete by die Hotel Charles op Klipplaat geniet.
Op pad terug het die deelnemers die dag se hitte langs die pad in 'n sementdam probeer ontsnap en die ergste stof afgewas, waarna die laaste gedeelte van die roete aangepak is.
Die avontuur is afgesluit met 'n gelukstrekking en Willem Avenant van Murraysburg wat die roete die vinnigste voltooi het sonder om te val, is met ’n trofee vereer.
Die trofee is geskenk deur Flashcor.
Tyremart in Graaff-reinet, dié geleentheid se hoofborg, het groot pryse vir die gelukstrekkings geskenk.
Hierdie pryse is gewen deur Joe Kroon van Graaff-reinet en Pierre-martin Lombard van Cradock.
Die organiseerders bedank almal vir hulle ondersteuning en deelname en ’n ekstra groot dankie gaan aan Tyremart Graaffreinet en Flashcor vir die borgskappe.