LVS kweek karaktervolle kinders
John Luther het gesê: "Goeie karakter moet meer geprys word as enige ander uitstaande talent. Die meeste talente is ‘n geskenk van Bo. Goeie karakter, in teendeel, word nie aan elkeen geskenk nie. Ons moet dit stukkievir-stukkie self bou deur ons keuses, moed en deursettingsvermoë".
Januarie dié jaar het Laer Volkskool afgeskop met hul 'Kleurvolle Karakter'program wat reg deur die jaar deur leerders, personeel en ouers by die skool beoefen is.
Hierdie program het dit ten doel om kinders te leer hoe om hulself, asook andere om hulle, te omskep in mense met goeie karakter in die samelewing.
Daar is ses karaktereienskappe wat deur die jaar vir ongeveer ses weke per karaktereienskap behandel is. Die karaktereienskappe is betroubaarheid, respek, verantwoordelikheid, regverdigheid, burgerskap en omgee.
Met die bekendstelling van elk van dié karaktereienskappe aan die kinders, het die skool die gemeenskap betrek om die karaktereienskappe prakties aan die kinders te verduidelik en/of demonstreer.
Betroubaarheid is byvoorbeeld afgeskop met die plaaslike polisie se honde-eenheid wat ‘n demonstrasie gelewer het met hul spesiaal opgeleide polisiehonde.
Hierdeur het die kinders ‘n beter begrip gekry van hoe om ‘n betroubare individu te wees, want wat is dan nou ‘n beter voorbeeld van 'betroubaarheid' as die mens se beste vriend?
Om dan hierby aan te sluit, kon die leerders deur die jaar sleutelhouertjies bymekaar maak, wat elke karaktereienskap uitgebeeld het.
Natuurlik was 'betroubaarheid' se sleutelhouertjie ‘n hondebeentjie. Die leerders was toegelaat om die sleutelhouers aan hul tasse te dra as visuele herinnerings om hul ten alle tye te herinner aan die ses 'Kleurvolle Karakter'-eienskappe.
Die OOV mamma’s het ook deur die jaar die skool se voorportaal se kennisgewingbord pragtig versier, toepaslik tot die karaktereienskap wat op daardie tydstip deur die skool behandel is.
Elke graad in Laer Volkskool het dan ook gehelp om die 'Kleurvolle Karakter'reënboog te bou en versier gedurende die jaar. Die Graad 2’tjies het hulself omtrent oortref met hul pragtige geel ‘respek’-bogie wat hul gemaak het vir dié reënboog. Hierdie reënboog word as 'n ‘n simbool gesien van die ‘Kleurvolle Karakter’ Volksies en is tans te sien in die skool se voorportaal.
Vele liefdadigheidsorganisasies in Graaffreinet het baat gevind by hierdie 'Kleurvolle Karakter'-program, onder andere, Boundless wat die spesiale ses karaktersleutelhouers ontwerp en gemaak het. Dié projek het gesorg dat hul deur die jaar altesaam 2 328 sleutelhouers gemaak en verkoop het vir Laer Volkskool.
Die 'Kleurvolle Karakter'-program het afgesluit met die karaktereienskap van 'omgee'. Dit was juis so beplan dat 'omgee' saamval met Graaff-reinet se jaarlikse Pink Trees for Pauline-veldtog. Die wins wat deur die jaar uit die 'Kleurvolle Karakter'-projek gemaak is, is oorhandig aan leerkrag Rita de Villiers, wat jaarliks die kankerfondsinsameling behartig by Laer Volkskool.
Elke leerder en onderwyser by die skool het dan ook verlede Vrydag, op die laaste dag van die program, ‘n roomys ontvang, omdat hulle deursettingsvermoë en volharding getoon het reg deur die jaar met dié program.