Posduifklub neem na 56j afskeid van ’n legende
Verlede Saterdagaand, 17 November, het die lede van die Merino Posduifklub van Graaff-reinet by hul jaarlikse prysuitdeling, afskeid geneem van 'n besonderse klublid wat oor die laaste 30 jaar meer as enige ander lid as klubkampioen gekroon is.
Pierre Els het op 79-jarige ouderdom besluit hy gaan dié sport vaarwel roep - hy en sy eggenote Adrie wil nou 'n bietjie die land gaan verken.
Om 'n vliegloopbaan van meer as 'n halwe eeu te kroon, het hy wéér die seisoen as klubkampioen afgesluit.
Die klub het hom vereer met 'n trofee vir die 56-jaar wat hy as lid van die klub aktief was.
Die ander lede wat presteer het die pas afgelope seisoen is Petrie Maré wat aangewys is as reserwe kampioen en David Hampton wat die derde plek opgeraap het.
As dit nie was vir sy ongereelde ure van werk nie, kon JR Marais beter gedoen het as sy vierde posisie onder die klublede - hy het egter vir die tweede keer in 'n ry agter David Hampton geëindig in die Ope Noordwedvlugte.
Pierre Els is as die Jaaroud Noordkampioen gekroon en David Hampton as die Algehele Noord-kampioen.
Met die Suid-wedvlugte is Els as kampioen in al die afdelings aangewys. Petrie Maré het erkenning gekry vir die 'beste duif vir die seisoen'.
"Dié sport gaan baie armer wees sonder oom Pierre, maar ons almal gun hom en tannie Adrie die rondryery," meen 'n woordvoerder vir die klub, Petrus Blignaut.
Dié sport gaan baie armer wees sonder oom Pierre maar ons almal gun hom en tannie Adrie die rondryery.