Afgetrede onnies wil ’n verskil maak
Regina Bosman, Audrey Petersen en Edith Bosch, drie afgetrede onderwysers van Graaff-reinet, wil graag 'n verskil in die plaaslike gemeenskap maak.
Siende dat al drie van hulle jare se waardevolle ondervinding in die onderwys het, het dit net sin gemaak dat hul terugploeg in dié area.
"Weens die styging van werkloosheid en alkoholisme in ons gemeenskap, word baie kinders gedwing om skool te verlaat as gevolg van onoplettende ouers en die onvermoë om skool te loop," sê Edith.
"Dit is om dié rede dat ons besluit het om 'n spesiale skool oop te maak wat hierdie kinders sal help om die nodige onderwys te kry wat hulle verdien."
Die skool, wat Thembalethu LSEN (Learners with Special Education Needs) gaan heet, sal poog om kinders met aandaggebreksindroom (ADD) en Fetale Alkoholsindroom (FAS) te help.
"Die meeste van hierdie kinders word nie die geleentheid gebied om te leer nie, aangesien hulle soms as stout gesien word of nie na die onderwysers luister nie en uiteindelik die skool moet verlaat weens die feit dat hulle nie die werk kan bemeester nie as gevolg van leerprobleme," voer Aubrey aan. "In die hoofstroom-onderwys is dit oor die algemeen ook moeilik om kinders met leerprobleme die nodige individuele aandag te gee, aangesien die klasse oorvol is."
Die drie onderwysers sien dit as hul sosiale verpligting om kinders met spesiale behoeftes by te staan. Die skool sal leerders met leerprobleme inneem vanaf Graad 1 tot en met Graad 3 en is reeds geregistreer. Daar sal ook 'n dokter, verpleegster, maatskaplike werker en sielkundige / arbeidsterapeut by dié skool betrokke wees.
Klasse sal van 08:00 tot 12:00, Maandag tot Vrydag, plaasvind.
Daar word gehoop om die skool op 14 Januarie volgende jaar oop te maak, maar hulle benodig nog borge vir materiaal en toerusting.
Vir meer inligting, of om 'n skenking te maak, skakel Regina by 063 615 0332 of stuur 'n e-pos aan esbosch2008@yahoo. com, skakel Edith by 082 930 9523/049 892 4861 of Aubrey by 076 866 3119.