Acasiastraat liggies ’n ervaring
Inwoners van Acasiastraat in Kroonvale het weereens vanjaar die straat in 'n fantasiewêreld omskep met duisende Kersliggies.
Dis al 'n tradisie vir meeste Graaff-reinet-inwoners en besoekers tot die area om elke jaar die pragtige liggieskouspel te gaan kyk wanneer die son se laaste strale die dag groet en Acasiastraat in 'n sprokieswêreld omskep word.
Dié projek het Saterdagaand, 15 Desember, afgeskop en sal die liggies skyn tot en met die aand van die 31ste, waarna dit weer tot volgende jaar gebêre sal word.
Volgens een van die organiseerders, Alan Hoffman, is dié jaar se geleentheid weereens goed georganiseer en is dit tot dusver goed deur die publiek ondersteun.
"Oud en jonk maak van dié geleentheid gebruik om hulself te verwonder aan die straat se feestelike atmosfeer. Dit is veral lekker om die kinders wat hier deurloop se gesigte dop te hou," meen Hoffman. "Party kindergesiggies is oortrek met opgewonde glimlaggies terwyl ander weer onseker is oor die oom met die grys baard en rooi klere wat op en af in die straat loop."
Alle fondse wat deur dié jaarlikse projek geïn word, word aan die Graaff-reinet Kankervereniging oorhandig en word die publiek aangemoedig om dit te ondersteun oor die volgende paar dae.
"Bring gerus hierdie feesseisoen jou familie en kom geniet die atmosfeer in Acasiastraat!" nooi Hoffman.