Nuwe huisouers vir Hvs-koshuis
Jaco en Janine van Schalkwyk is onlangs as die nuwe huisouers van Hoër Volkskool se Huis Cronje aangestel.
Janine het groot geword in Bloemfontein waar sy haar skoolloopbaan en daarna haar tersiêre studies voltooi het.
Sy het aanvanklik ‘n graad in onderwys behaal, maar die sielkunde het haar meer gefassineer. Sy het dus ‘n Honneursgraad in Opvoedkundige
Sielkunde behaal en ook hierna haar Meestersgraad in Spelterapie voltooi.
Haar eggenoot, Jaco, is oorspronklik van Vanwyksvlei in die Nood-kaap.
Hy was in Carnarvon op laerskool, maar het sy hoërskool loopbaan voortgesit by Paarl Boys High in die Paarl.
Hy het voorts by Stellenbosch studeer, maar die Westelike Provinsie het hom ‘n kontrak aangebied en sy rugbyloopbaan het begin.
Jaco het hierna ‘n pos aanvaar by die Cheetahs en dit is waar hy vir Janine ontmoet het... in ‘n Pick n Pay in Bloemfontein. Jaco het intussen ook Springbok 7's gespeel vir vier jaar.
Jaco en Janine was lank slegs vriende en hul paadjies het geskei toe Jaco in Italië rugby gaan speel het en Janine in Durbanville gewerk het.
Die koeël was egter deur die kerk toe Jaco terugkeer uit Europa en het die paartjie toe in Johannesburg die knoop deurgehaak en vir 'n rukkie dit hul tuiste gemaak terwyl Jaco vir die Lions gespeel het.
Jaco en Janine het hierna in Rome, Italië, gaan woon, asook in Bordeaux in Frankryk.
Met hul terugkeer na Suid-afrika het Jaco ‘n laaste kontrak aanvaar by die Kings in Portelizabeth. In 2011 is hul dogtertjie, Zenicke, in Port Elizabeth gebore en in 2015 hul seun, JJ.
Die paartjie het na agt jaar in Portelizabeth besluit om die sjarme van die platteland aan te gryp en hulself toe in Graaff-reinet kom vestig. Jaco is deur Hoër Volkskool in diens geneem as die direkteur van rugby en Janine gaan remediëring aanbied by Laer Volkskool. Hulle is onlangs ook aangestel as die nuwe trotse huisouers van Hoër Volkskool se Huis Cronjé en hoop die egpaar om ‘n verskil te maak in die lewe van elke koshuiskind.