Inwoners brul oor raadslede
'n Gemeenskapsorganisasie wat a-polities is, is vasbeslote om druk op die munisipaliteit en raad te plaas om inwoners eerste te stel bo persoonlike- en politieke agendas.
Die groep wat as ROAR (Ruk Oudtshoorn Administrasie Reg) het Dinsdagoggend met plakkate voor die munisipale kantore betoog. 'n Raadsvergadering wat Dinsdagoggend sou plaasvind is op die nippertjie deur die speaker, Julia le Roux, uitgestel omdat sy volgens 'n verklaring eers die wettigheid van 'n item wat Vrydag voorgelê is, wil bevestig. Dit blyk dat die raad verlede Vrydag tydens 'n spesiale raadsvergadering wou besluit om Le roux en raadslid George Kersop op verpligte verlof te plaas. Dit is hierdie besluit waarvan die regmatigheid nou eers bevestig moet word.
Willie Coetzee, voorsitter van ROAR, het Dinsdag gesê dit is onaanvaarbaar dat raadslede en amptenare met hulle eie agendas die inwoners gyselaar hou.
"Ons dring daarop aan dat die administrasie en bestuur van die munisipaliteit deursigtig en verantwoordelik moet wees. Hier is nou te veel vrae en aantygings en vertragingstegnieke aan die gang en dit is nie hoe demokrasie werk nie."
Hy het aangedui dat ROAR geen politieke party steun nie en dat hulle lede vanuit verskeie dele van gemeenskap kom. "Oudtshoorn se mense kry reeds baie swaar en hierdie tipe optrede van mense wat na ons belange moet omsien is nie aanvaarbaar nie."
Dit is nog nie duidelik wanneer die raadsvergadering gaan plaasvind nie, maar dit is steeds baie duidelik dat die DAraadslede nie meer uit een mond praat nie en waarskynlik nie eenstemmigheid oor sekere kwessies het nie en daardeur gevaar kan loop om beheer oor die raad te verloor.