18 maande vir kabeldiefstal

Drie mans van De Doorns, wat sedert 2017 in aanhouding was, is verlede week in die Oudtshoorn-streekhof aan diefstal van koperkabels skuldig bevind en tronkstraf opgelê.

Mathai en Daniël Masola, twee broers, is saam met Maine Mathomelo daaraan skuldig bevind dat hulle Telkom-koperkabels ter waarde van sowat R10 000 buite Ladismith gesteel het.

Polisielede van Ladismith het getuig hoe hulle die beskuldigdes vir vier ure dopgehou het en toe gearresteer het.

Sers. Bennet de Wee het getuig dat hulle gesien het hoedat die beskuldigdes op 'n leer teen telefoonpale opklim om die kabels te knip. Dit was volgens ‘n werknemer van Telkom nie meer in gebruik as gevolg van vorige diefstalle.

Beslag is gelê op sewe rolle koperkabels asook ander items soos ‘n leer, handskoene, tange en selfone.

Matai Masola en Mathomelo het besluit om nie te getuig nie terwyl Daniël Matola getuig het dat hy en sy broer ‘n rygeleentheid by Mathomelo gekry het om werk te gaan soek.

Hy het ontken dat hy in besit was van tange en erken dat hy bewus is daarvan dat die publiek nie Telkom-kabels mag knip nie.

Die beskuldigdes se regshulpprokureur, Wenzel Botha, het die hof versoek om vir vonnisoplegging in ag te neem dat die kabels nie meer in gebruik was nie en daar onsekerheid oor die waarde daarvan bestaan.

Die staatsaanklaer, Willem Vister, het die hof vir direkte gevangenisstraf gevra omdat dit die enigste gepaste vonnis sal wees en ‘n boodskap vir voornemende kabeldiewe sal uitstuur.

“Kabeldiewe kom na klein plattelandse dorpies soos Ladismith om ‘n misdryf te kom pleeg.”

Volgens Vister veroorsaak die diefstal van telefoonkabels groot ongerief vir die publiek en skade vir Telkom.

“Alhoewel die beskuldigdes reeds lank in aanhouding is beteken dit nie dat hulle vandag net vry uit die hof kan stap nie, omdat ’n vonnis van tot 30 jaar vir diefstal van koperkabels opgelê kan word,” het Vister betoog.

Diefstal van telefoonkabels het ’n groot impak op die internet en telefoondienste en die beskuldigdes het met al die nodige gereedskap vanaf De Doorns na Ladismith gery.

Volgens streeklanddros Retha Pretorius, het die betrokke getuies ‘n baie goeie indruk op die hof gemaak en nie mekaar weerspreek nie.

Sy het bevind dat nie een van die drie beskuldigdes enige berou getoon het nie en dat direkte gevangenisstraf die enigste gepaste vonnis is om dié soort misdaad hok te slaan. Die diefstal is volgens haar ook fyn beplan en die saak kon reeds lankal afgehandel gewees het, indien die beskuldigdes eerlik was met die hof.

Sy het met vonnisoplegging in ag geneem dat hulle vir byna drie jaar in aanhouding was, en ook eerste oortreders is. Sy het elkeen tot 18 maande gevangenisstraf gevonnis.