Burgemeesterstoel nog oop
Dit is nog nie seker wanneer 'n raadsvergadering in Oudtshoorn gaan plaasvind om die DA se nuwe burgemeesterskandidaat, Chris McPherson, in die amp te bevestig nie.
McPherson se nominasie as burgemeester is verlede week deur die DA se federale uitvoerende raad goedgekeur en deur Eleanor Bouw-Spies, kiesafdelingshoof van Oudtshoorn, aangekondig.
Die burgemeesterspos is vakant sedert die vorige burgemeester Colan Sylvester, sowat 'n maand gelede sy lidmaatskap van die DA opgesê het.
'n Raadsvergadering sal nie voor 18 Julie kan plaasvind nie aangesien die speaker, Julia le Roux, Saterdag aangekondig het dat alle raadslede vir 14 dae in selfkwarantyn moet gaan, nadat een van hulle positief vir Covid-19 getoets is. Die munisipale kantore en vier munisipale betaalpunte in die groter Oudtshoorn-gebied is ook hierdie week gesluit nadat 'n amptenaar positief getoets is.
Onder normale omstandighede sou dit 'n gegewe wees dat McPherson deur 'n meerderheidstem as burgemeester aangewys sal word.
Die bedanking van Sylvester het egter juis gevolg op tweespalt wat tussen DAraadslede ontstaan het. Die tweespalt duur reeds ‘n geruime tyd en dit is nie 'n uitgemaakte saak dat al die DA-raadslede die aanstelling van McPherson sal steun nie.
Algemene konsensus onder talle mense is dat McPherson die aangewese persoon vir die pos is aangesien hy reeds jare ervaring as politikus het en ook besondere goeie kennis van munisipale prosesse en finansies het. Hy was 'n DA-raadslid tot 2016 toe die DA uitstekend gevaar het met die plaaslike verkiesing. Omdat dié party soveel wyke verower het, moes die aantal proporsionele raadslede verminder word en McPherson was een van hulle.
Intussen het die munisipaliteit gisteroggend bevestig dat hulle deur die OVK in kennis gestel is dat McPherson nou ‘n DA-raadslid is. Hy vervang Colan Sylvester op die raad.