Laerskool-ouers besorg oor skoolrisiko
Ouers van leerders by Laerskool Towerkop op Ladismith het Maandagoggend reeds vanaf 07:00 voor die skool bymekaargekom uit ontevredenheid oor die heropening van skole.
Rodge Albertus, voorsitter van die beheerliggaam, het gesê ouers is bekommerd oor die gesondheidsrisiko as meer en meer kinders teruggaan skool toe.
"Ouers behoort nie aan mediese fondse om die beste gesondheidsorg vir hul kinders te verseker nie. Hulle bly in die plakkerskampe waar weinig toegang tot skoon lopende water is. Ouers kan nie reinigingsmiddels bekostig nie en dit maak hul kinders meer kwesbaar vir siektes," het hy gesê.
Ricardo Herandien, voorsitter van die beheerliggaam van Ladismith Sekondêr, was ook by die plakkaatbetoging, en het gesê dat die hoërskool reeds geraak is deur Covid-19,nadat 'n leerder positief getoets is en drie opvoeders vir hulle uitslae wag.
Volgens die ouers sal hulle elke dag by die skole betoog om die onderwysdepartement tot ander insigte te bring.
Jeffrey Donson, leier van Icosa en voormalige burgemeester van Kannaland, was ook by die betoging.
"Dit is so duidelik soos daglig dat die ANC-regering nie 'n plan het hoe om hierdie pandemie te bestuur nie. Opvoeders is vakspesialiste en wanneer hulle sou siek word, word hulle nie noodwendig met 'n ander spesialis vervang nie, maar net met enige plaasvervanger wat dan meer skade as goed aan die leerder bring," het Donson gesê.
Maandagoggend was daar slegs ongeveer 70 van die laerskool se ongeveer 200 leerders wat in gr. R, 6 en 7 ingeskryf is.