Vermeende moordenaar storm uit hofsaal

Twee hofordonnanse in die Oudtshoornstreekhof moes Vrydag skarrel om ’n vrou, wat van moord aangekla word en om borgtog aansoek gedoen het, te vang toe sy uit die beskuldigdebank gestorm het. Dit het gebeur voor die landdros uitspraak in haar aansoek kon lewer.

Sy het op almal geskel en gevloek en die twee polisiebeamptes het hul hande vol gehad om haar in die hofselle te kry.

Natasha Mgengo (28) het vroeër reeds gesê dat die hof moet klaarmaak. "Maak net klaar met my," het sy gesê.

Sy het tydens die getuienis van sers. Henry Smith telkens uit die beskuldigde bank die verrigtinge onderbreek deur saam te praat en hardop gehuil. Sy het skielik opgespring toe die staatsaanklaer, Nadia Arnolds, die hof vra om borgtog te weier omdat sy nie 'n vaste adres kon verskaf nie en moontlik nie haar verhoor sal bywoon nie.

Mgengo het erken dat sy vir Sheila Karelse, met ‘n mes gesteek het.

"Ek het haar niks gedoen nie en sy sou my gesteek het as ek nie die Okapi by haar gevat het nie. Ek het haar met haar eie mes gesteek, maar sy het nog geleef."

Volgens Mgengo het hulle die aand saam by verskeie taverns in Kwa Mandlinkosi op Beaufort-Wes gedrink.

Smith het borgtog teengestaan omdat Mgengo baie aggressief is en vir haar eie lewe gevrees word.

Sy het op almal geskel en gevloek en die twee polisiebeamptes het hul hande vol gehad.

Streeklanddros Daniel Boks het uitspraak in die beskuldigde se afwesigheid gelewer en gesê dit is in belang van geregtigheid en haar eie veiligheid dat sy in aanhouding bly. Vrese bestaan dat sy nie haar verhoor sal bywoon nie en daar is glo dreigemente van die oorledene se familie dat sy seergemaak kan word.

"Die hof kan nie toelaat dat die beskuldigde se lewe in gevaar gestel word nie."

Die saak is vir verhoor tot 7 September uitgestel.