Klag van dronkbestuur word ondersoek
Vier voertuie het die afgelope aantal dae op paaie in die omgewing omgeslaan en in ten minste een ongeluk word 'n klag van dronkbestuur ondersoek. Die dronkbestuurklag volg nadat 'n 'n Toyota Hilux verlede Woensdagmiddag in Parkweg omgeslaan en 'n woning se elektroniese hek beskadig het. Daar was ses kinders saam met die bestuurder in die bakkie tydens die ongeluk. Die bakkie was met Rademeyerstraat in die rigting van Parkweg onderweg toe die bestuurder beheer oor die bakkie verloor het by die draai waar Parkweg en Rademeyerstraat bymekaar aansluit. Die bakkie het oor die pad geswaai en toe omgeslaan en 'n palissadehek voor 'n woning getref. Die bakkie het op sy sykant in die erf tot stilstand gekom.
Paramedici het die kinders op die toneel behandel, maar dit blyk dat daar nie ernstige beserings was nie. Die bestuurder van die voertuig met 'n Noord-Kaapse registrasienommer is op die toneel deur polisie in 'n polisievoertuig gelaai waar hy in 'n onderonsie met polisiebeamptes gewikkel geraak het. Volgens die argument het hy geweier om gehoor te gee aan 'n opdrag om sy selfoon aan die polisie te oorhandig en dit is na die struweling by hom afgeneem.
Sersant Gretchen Michaels, kommunikasiebeampte van die Oudtshoornpolisie het bevestig dat 'n klag van dronkbestuur ondersoek word.
Die ongeluk het op dieselfde draai plaasgevind waar 'n geel Ford Mustang ongeveer twee weke gelede 'n paal en 'n betonheining getref het.
Woensdagoggend het 'n ligte vragmotor op die Volmoedpad ook omgeslaan nadat dit op die skouer van die pad beland het. Die vragmotor behoort aan 'n maatskappy wat tydelike toilette oprig en onderhou. Die bestuurder en 'n werker was na Volmoed onderweg om toilette te diens. Volgens die bestuurder het hy na links padgegee om 'n ander voertuig toe te laat om hom verby te steek. Hy het hom egter misgis en te ver na links gegaan waarna die voertuig op die skuinste langs die pad beland het. Met die terugswenk na die teeroppervlak, het die voertuig omgeslaan. Niemand is ernstig beseer nie.
In 'n derde voorval verlede week het 'n rooi Tata Vrydagaand omstreeks 21:00 sowat 6 km buite Oudtshoorn op die Georgepad gerol. Die bestuurder was alleen in die motor en is met ligte beserings per ambulans hospitaal toe geneem. In die jongste ongeluk het die bestuurder van 'n VW Golf ongedeerd van 'n toneel weggestap nadat sy motor Dinsdagoggend omstreeks 08:00 in die omgewing van Klaarstroom gerol het. Dit is onduidelik wat die ongeluk veroorsaak het, maar nooddienswerkers op die toneel het gesê daar was Dinsdagoggend 'n sterk wind in die area. Die Golf het die pad op 'n reguit gedeelte bystergeraak.