Meyer verloor kankerstyd
'n Passievolle onderwyseres, wat diep spore in die onderwyskringe in George getrap het en in haar eie tyd 'n legende was, Johlene Meyer (74), is Sondagmiddag na 'n lang siekbed oorlede.
Sy is einde 2018 met kanker gediagnoseer en het tot Sondag 'n verbete en dapper stryd in verskeie hospitale in Kaapstad en later in George gevoer.
Johlene, néé Claassen, het in die laat 1960's 'n pos by die destydse Laer Meisieskool in George aanvaar en na amalgamasie met die Laerskool Manie le Roux vir baie jare by die Laerskool Outeniqua skoolgehou. Na haar troue met Jannie Meyer, oudredakteur van die George Herald, moes sy bedank soos die gebruik destyds was. Sy het by verskeie skole in en om George afgelos totdat sy by Laerskool Blanco afgetree het.
Sy is op 'n plaas buite Calitzdorp gebore waar sy ook haar skoolloopbaan voltooi het. Daarna het sy aan die destydse onderwyskollege Oudtshoorn en Paarl gestudeer. Haar eerste onderwyspos het sy op Barrydale aanvaar waarna sy na George verhuis het.
Onderrig was Johlene se passie en sy het 'n besondere slag met kinders gehad. Tot haar siekte het sy nog 'n lewende belangstelling in die onderwys gehad en met baie van die kinders wat in haar klas was kontak gehou. Sommige van hulle het haar gereeld besoek en hoewel baie van hulle volwassenes was, het hulle haar steeds as "juffrou" aangespreek.
Na haar dood het boodskappe van medelye van oral ingestroom en baie van haar vriende en kennisse het haar as 'n legende in haar eie tyd beskryf.
'n Troosdiens word vanmiddag (Donderdag) om 14:00 in die NG Kerk Blanco ter ere van haar gehou. As gevolg van die inperkingsmaatreëls is dit 'n geslote diens, maar die diens sal wel regstreeks deur die NG Kerk Blanco se Facebook-blad uitgesaai word.
Diegene wat wel 'n fisiese eerbewys wil betoon kan van 11:00 tot 13:30 op die stoep van die kerk 'n kersie aansteek, 'n nota of blomme laat.
Johlene laat haar man, Jannie, drie kinders, Juanita Janse van Vuuren, Mardre Meyer en Mariska Wessels, asook drie kleinkinders agter. Hul oudste seun, Jan, is in 2009 in 'n motorongeluk oorlede.