Ouma Jane word 102
Vele opgewondenheid het Vrydag 4 September in Asherville geheers, waar ouma Jane Louw van Iristraat haar 102de verjaarsdag gevier het.
“Ons is so dankbaar dat die Here haar vir nog ’n jaar vir ons gespaar het,” het Jane se dogter, Maria Dallah, aan die Graaff-Reinet Advertiser gesê. Volgens Maria is haar ma in 1918 in die Aliwal-Noord-distrik gebore, en sy het deur die jare kombuiswerk gedoen.
Jane het 10 kinders gehad, waarvan vyf nog lewe. Maria sê sy is nie seker wanneer haar ma na Graaff-Reinet verhuis het nie, maar dit is waar al haar kinders grootgeword het. Vandag het Jane 16 kleinkinders.
Van hierdie kleinkinders het op haar verjaarsdag tyd saam met Jane spandeer, en veral die jonger klomp was opgewonde om deel van hierdie spesiale geleentheid te wees. “Ouma Jane is baie liefdevol,” het kleinkind Sharon Louw gesê.
Volgens Maria is Jane baie lief vir sing en kinders, wat sy uitleef deur haar betrokkenheid by die NG Kerk. “Sy is ook baie lief vir baba’s en is altyd besig met hulle,” het Sharon bygevoeg.
Jane was dus baie gelukkig om deur haar kinders en kleinkinders omring te word op haar 102de verjaarsdag. Natuurlik was daar later ook lekker nagereg, want wat is ’n verjaarsdag nou sonder koek?