Infanterieskool kry 50 nuwe bome
Jaco Vorster, inisieerder van die Oudtshoorn Trees of Hope-projek en voorsitter van die Oudtshoornbesigheidskamer, het verlede Vrydagoggend in samewerking met die Oudtshoorn Infanterieskool, 50 doringbome as deel van Nasionale Boomplantdag geplant. Dertig van die bome is buite die weermag se basis in Parkweg geplant, terwyl die res op die Infanterieskool se terrein geplant is.
Tydens sy toespraak het Vorster gesê dat daar beplan word om 'n bykomende 50 bome in die nabye toekoms te plant. Volgens hom het die idee om bome van hoop op Oudtshoorn te plant gestalte gekry toe 'n boom sowat 3 km buite Oudtshoorn deur die munisipaliteit afgekap is omdat dit glo die sig van aankomende verkeer belemmer het. Die afkap van die boom het emosionele reaksie van die publiek ontketen omdat, behalwe vir die sentimentele waarde wat die publiek aan die boom geheg het, dit ook as baken vir menige inwoners en toeriste was.
Vorster het die Oudtshoorn Infanterieskool bedank vir hul onderneming om toe te sien dat die bome gereeld natgelei sal word.
Die Oudtshoorn-burgemeester, Chris MacPherson en speaker, Julia le Roux het ook die verrigtinge bygewoon.