Oudbevelvoerder sterf
Die voormalige stasiebevelvoerder van die Oudtshoorn-polisiestasie, brigadier Lavona Januari, is Sondagmiddag oorlede.
Volgens kapt. Louis Visser, woordvoerder van die Oudtshoorn-polisie, is sy op 12 Julie in Panorama MediClinic opgeneem na sy met Covid-19 gediagnoseer is. Sy was in die intensiewesorgeenheid van die hospitaal.
"Sy het nie meer positief getoets vir die virus nie en is dood na haar organe ingegee het."
Januari was sedert 2014 stasiebevelvoerder op Oudtshoorn en het Maart vanjaar, na 38 jaar diens in die polisie, afgetree. Na haar aftrede het sy weer na Kaapstad teruggetrek.
Sersant Gretchen Micheals, woordvoerder van die Oudtshoorn-polisie, maar ook 'n vriendin van Janauri het haar as 'n lieflike mens met 'n hart van goud beskryf.
"Sy was baie meer as net 'n leier, sy was 'n vriendin. My hart is stukkend oor haar. Sy gaan deur almal wat haar liefgehad het gemis word."
Januari se skoondogter, Melissa Abrahams-Januari, het op Facebook gesê haar skoonma het altyd die mooi in almal gesien en het almal onvoorwaardelik liefgehad.
Sy word oorleef deur haar man, twee seuns, een skoondogter en drie kleinkinders.
Haar begrafnis vind Donderdag in Durbanville, Kaapstad plaas.