Kuns herleef vergete era
PRINCE ALBERT - Die bekende kunstenaar John Kramer, se uitstalling van ou geboue word tans by die Prince Albert Gallery gehou. Volgens dr. Judy Maguire, historikus en antropoloog van dié dorp neem Kramer se skilderye mens terug na ’n verdwene era toe ou geboutjies met kleurvolle voorkante ons dorpe en stede versier het.
“As jy na John se skilderye kyk, ruik jy die stowwerige strate, ervaar jy die mengsel van geure in die skemer binnekante van die winkeltjies van die verlede.”
Kramer (75) wat op Worcester gebore is het aan Oudtshoorn Courant gesê die vasvang van dié geboue op doek is deel van ons kollektiewe geheue, “argitektuur wat ons nie mag vergeet nie, van ’n tyd toe ons dorpe anders gelyk het as nou. Die lekkerste onderwerpe vir my skilderye vind ek op plattelandse dorpe wat die verwaarloosste is, daardie geboutjies met geroeste sinkdakke en vervalle mure”.
Hy reis reeds sedert die jare sewentig deur die land om sulke geboue af te neem.
Volgens Maguire is Kramer se skilderye,
“’n argief van ’n deel van die SuidAfrikaanse
argitektoniese nalatenskap. Dis ’n gemeenskaperfenis wat deel vorm van ons identiteit”.
Destyds het hy reeds besef dat dorpe vinnig deur vernuwing verander. Hy het die strate met sy kamera begin vaslê, om te keer dat dit uit sy geheue verdwyn en met sy skilderkuns op doek vasgelê. Letterwerk teen die mure, met woorde soos Tea Room en Teekamer en Algemene Handelaar, handelsname soos Koffiehuis, Coca-Cola, Texan, Lucky Strike en Boxer Tobacco word gereeld in sy skilderye vasgevang. Kramer, wat in Kaapstad woon, het ook saam met sy broer, die musikant en sanger, David Kramer, na die platteland getoer om foto’s te neem wat as agtergrond sou dien vir die musiekblyspel, Karoo Kitaar Blues.
“Mense verlang na daardie plekke wat hulle as kinders besoek het of waar hulle gewoon het, plekke waarmee hulle ’n persoonlike verhouding het. Iemand wat nou in San Diego woon, het ’n skildery gesoek waarop Afrikaanse letterwerk is. ’n Australiër het my skildery van Alie’s Corner in die Waterkant gekoop toe sy die hoekkafee van haar jeug herken het,” sê Kramer. Kramer se uitstalling duur tot 1 Augustus.