Splinternuwe baadjie vir kleuterskool
CALITZDORP - Danksy die kunstalent en toewyding van vier inwoners van Calitzdorp is ‘n kleuterskool besig om heeltemal van gedaante te verander.
Angela Diedericks en haar drie helpers, Estella Diedericks, Duan Diedericks en Gailiano Dondas is reeds meer as drie weke besig om die geboue van Die Heuwel Speelskool in reuseskilderye te verander.
Angela het Dinsdag aan Oudtshoorn Courant gesê die eienaar van die grond waarop die skool geleë is, het haar genader om die skool op te helder.
“Dit is ‘n wonderlike geleentheid, hy het borge vir al die verf en dit is vir ons vier ook ‘n inkomste vir solank as wat die projek duur,” het Angela gesê.
Volgens haar word ongeveer 300 kleuters tussen die ouderdomme van 2 en 6 jaar by die skool gehuisves. Sy is self ‘n kleuterskoolonderwyseres, maar sy het nie ‘n pos nie.
“Hierdie projek is nie net iets om ons besig te hou nie, dit is ook ‘n manier waarop ons ‘n daadwerklike verskil aan die gemeenskap kan maak,” sê sy.
Teen Dinsdag was hulle na bykans drie weke se werk, ongeveer halfpad met die eerste gebou en die span hoop om al drie die geboue se versiering binne die volgende twee maande te voltooi.
Volgens Angela teken sy eers die ontwerpe op papier sodat die eienaar van die grond dit kan goedkeur. Daarna teken sy die sketse vryhand op die muur en dan begin die verfwerk.
“Duan en Gailiano doen vir ons die groot werk om die agtergronde te verf en dan verf ek en Estella die mense en ander kleiner voorwerpe.”
Die Heuwel Speelskool lê langs die
R62 net buite Calitzdorp onderweg na Ladismith.