Aanrander ses jaar gevonnis
PRINS ALBERT - ‘n Man van wat sy meisie se gesig met brandende plastiek verbrand het, is Woensdag in die Oudtshoorn-streekhof ses jaar gevangenisstraf opgelê vir aanranding met die opset om ernstig te beseer.
Benjamin Jonas (30) het tereggestaan op aanklag van poging tot moord na hy die aand van 6 November 2020 ‘n ysterbak met vlammende plastiek na Celeste Sass gegooi en sy ernstige brandwonde aan haar gesig opgedoen het.
Sass het getuig dat Jonas, met wie sy vir agt jaar in ‘n verhouding was, haar die betrokke aand by ‘n vriendin se huis kom haal het en nog R50 van haar gevat het nadat sy vroeër die dag al geld aan hom gegee het.
Sy het hom agternagesit en klippe na sy opslaanhut gegooi.
Hy het toe die vlammende plastiek op haar gegooi.
Volgens haar het die plastiek aan haar gesig vasgesit en toe sy dit aftrek het dit ook van haar vel afgetrek.
Die staatsaanklaer, Elaine Plaatjies, het die hof versoek vir ‘n vonnis wat Jonas vir lank agter tralies sal hou omdat hy nie van vorige kanse gebruik gemaak het nie. Hy rand Sass gereeld aan en is al daarvoor gevonnis. Hy toon ook geen berou nie.
Jonas se regshulpprokureur, Cindy Murray-Smith, het die hof vir ’n gedeeltelike opgeskorte vonnis gevra.
Streeklanddros Daniel Boks het met vonnisoplegging gesê Jonas het Sass se gesig so geskend dat die letsels vir ewig daar sal bly. Sy het nie geld vir veloorplantingsoperasies nie en kan hom nie vergewe vir wat hy aan haar gedoen het nie. Sy moes baie pyn verduur en het naar geraak toe sy na haar gesig kyk.
‘n Korrektiewe verslag meld dat niemand Jonas blyplek wil gee indien hy ‘n opgeskorte vonnis sou kry nie, nie eers sy eie ma nie.
Hy het die vrou wat hy moet beskerm ernstig aangerand.