Digbundel vlieg op radiogolwe
OUDTSHOORN - Danksy Radio
Klein Karoo, die aanlyn-radiostasie wat in Januarie begin is, kon ‘n gesprek oor die pandemie-digbundel, Maskers en mure, Saterdagoggend deur luisteraars oor die wêreld heen gevolg word.
Cyril Clarke, een van die aanbieders by Radio Klein Karoo het Saterdagoggend op sy program, Klets met Clarke, vir bykans 90 minute met Hannes Visser oor dié uitsonderlike bundel en ook oor Visser se eie digkuns gesels. Tydens die gesprek het verskeie mense in die buiteland geluister en selfs in Spanje het elf Afrikaanssprekendes ingeskakel.
Maskers en mure is deur Turksvy Publikasies, waarvan Visser ‘n direkteur is, in samewerking met die KKNK, ATKV, Absa, Wes-Kaapse departement van kultuursake en sport en die Jannie Mouton-stigting uitgegee.
Die bundel bevat gedigte van 80 bekende Afrikaanse digters asook 62 gedigte van opkomende digters met die Covid-19pandemie as tema.
Daar is aanvanklik ‘n groot oplaag van 700 kopieë gedruk en die digbundel was vir twee maande tot en met 13 Augustus slegs aanlyn op die KKNK se webtuiste te koop. Dit is egter sedert Maandag vrylik beskikbaar en kopieë word onder andere deur PNA op Oudtshoorn aangehou.
Dit kan ook by turksvypublikasies@gmail. com bestel word.
Tydens die gesprek het Clarke en Visser oor digkuns in die algemeen gesels en Visser het ook oor sy persoonlike lewe en oor sy eie digbundel, die jaar toe pa..., gesels.
Hy het gesê hy is trots op dit wat hy en Marlene Malan, mededirekteur van Turksvy Publikasies en eggenote van die digter Daniel Hugo, tot dusver bereik het. Toe Clarke hom gepols het oor ‘n moontlike volgende saamgestelde bundel het hy die aap uit die mou gelaat dat daar die moontlikheid van ‘n volgende bundel in samewerking met die KKNK is wat daarop gaan fokus om ongepubliseerde digters van oor die hele land te betrek vir ‘n bundel met “vars verse”.
Danie le Roux, eienaar van Radio Klein Karoo, was glad nie verbaas oor die aantal buitelanders wat na die uitsending geluister het nie. Volgens hom is dit juis die groot voordeel van ‘n aanlyn-radiostasie.
“Mense kan op enige plek ter wêreld die toepassing aflaai en met die druk van ‘n knoppie selfs op hulle slimfone na Radio Klein Karoo luister,” sê hy.
Die radiostasie het tans meer as 30 000 volgelinge op hulle Facebook-blad waarvan talle in die buiteland woon.