Hugs of Hope kry eie opleidingsentrum
HOFMEYR - Hofmeyr Hugs of Hope, ‘n opleidingsinstansie in Hofmeyr, het die afgelope week ‘n groot droom verwesenlik toe hulle na hul eie opleidingsentrum kon verhuis.
Die nuwe lokaal is geleë in Hattinghstraat en binne loopafstand vanaf die kerksaal, wat ook as die gemeenskapsentrum bekendstaan.
Die instansie, wat reeds sedert 2017 vanaf die NG kerksaal bedryf word, het reeds verskeie mense in talle kursusse opgelei. Ongelukkig was die kerksaal nie voltyds beskikbaar nie. ‘n Filantroop het nou ‘n gebou aangekoop vir Hugs of Hope waar alle kursusse aangebied kan word. Die ou naaldwerklokaal het reeds die afgelope week begin oorskuif na die nuwe lokaal en daar is ook genoegsame water en ruimte om met die tuiniersopleiding te begin. Daar is ook ‘n ontspanningskamer ingerig vir wanneer die studente vir ete of tee breek.
Educare-, Home Based Care-, finansiële bestuur-, en Abetopleiding sal voortaan ook vanaf die nuwe lokaal aangebied word. Opleiding in naaldwerk word sedert die ontstaan van Hugs of Hope op ’n voltydse basis aangebied en alle naaldwerkers wat aan die vereiste vaardigheidsvlakke voldoen, ontvang ‘n naaimasjien om hul naaldwerk tuis te beoefen en hul eie inkomste te verdien.
Vyf vrywilligers vanuit die Hofmeyr-gemeenskap is voltyds betrokke by die instansie en is altyd op bystand om enige navrae te hanteer.