Gemeenskapsdiens verryk
TERESA OPPERMAN
MOLTENO - “Ek is die tipe persoon wat altyd uitreik na die mense rondom my, want soos hul lewens verbeter, so verbeter my eie lewe,” vertel Philander Karelse, ‘n afgetrede polisieman en nou die eienaar van Molteno Cleaning Services.
“Molteno Cleaning Services dien twee doele; die een is om ons dorp skoon te hou. Die tweede is eintlik die belangrikste, want ek doen sommer gemeenskapspolisiëring terwyl ek so deur die strate ry en skoonmaak. So kon ek al vele misdade voorkom en ek vorm ‘n verhouding met die jeugmisdadigers en probeer om hul te vergesel na ‘n beter plek in hul eie lewens.”
Dominee Nita de Wet van die plaaslike Methodiste-gemeente sê Karelse stam uit ‘n familie wat onderwysgeoriënteerd is en dit is duidelik wanneer daar gekyk word na die manier waarop hy hierdie straatkinders benader.
“Ek self het nooit die onderwysroete gevolg nie. Ek wou nog altyd by my gemeenskap betrokke wees en daarom het ek aanvanklik by die polisie aangesluit.”
Karelse het die afgelope week ‘n groot verskil gemaak in die lewens van alle sokkerspelers in Sterkstroom, wat oor vier sokkerspanne beskik. Hy het
‘n ruim skenking gemaak aan James
Spalla, voorsitter van die Sterkstroomsokkervereniging, nadat hulle hom genader het met ‘n versoek om balle en sokkertruie te skenk. Hy het ook drie sokkerballe elk aan die klubs Santos, Early Birds, KT en FC geskenk.
“Die lang skoolvakansies en die impak van die Covid-19-pandemie het ‘n negatiewe impak op die seuns. Ons probeer om hulle te motiveer om elke dag besig te bly,” sê Karelse.
“Ek is reeds besig om geld te spaar vir nuwe sokkertoerusting. Ek is ook opgewonde oor Cliffie & Son Auto Spares, wat besluit het om ook as borg betrokke te raak sodat ek ook aan die Molteno-sokkerklub se vier sokkerspanne twaalf balle kan skenk. Heel moontlik al volgende maand.”