Aanstelling gaan in hof draai
OUDTSHOORN - Die aanstelling van ‘n nuwe waarnemende munisipale bestuurder tydens ‘n raadsvergadering Vrydag, gaan in die hof betwis word.
Walter Hendricks, wat die afgelope vier en ‘n half jaar direkteur van gemeenskapsdienste in George was, is Vrydag tydens ‘n raadsvergadering in die plek van Reginald Smith as waarnemende munisipale bestuurder aangestel. Dit het gebeur nadat die samewerking wat daar tussen raadslede van die DA, Icosa en Sarco was blykbaar skipbreuk gely het en Sarco en Icosa hulle by die ANC geskaar het en die nuwe aanstelling gemaak het. Die DA het die aanstelling teengestaan.
Oudtshoorn-burgemeester, Chris Macpherson, het hierdie week gesê die regmatige prosesse om ‘n waarnemende munisipale bestuurder aan te stel is nie gevolg nie.
“Ons wil nie onnodig hof toe gaan nie, maar ons het geen ander keuse gehad as om die hof te nader vir ‘n dringende interdik om die aanstellingsproses as onwettig te verklaar nie,” het hy Woensdag gesê nadat die interdik Dinsdag in die landdroshof in Thembalethu, George, toegestaan is. Macpherson en Smith was die applikante vir die interdik. Volgens Macpherson word die saak op 9 September in die hof aangehoor. “Wat ons aanbetref is Smith steeds die regmatige waarnemende munisipale bestuurder,” het Macpherson gesê.
Intussen het Hendricks Dinsdag in ‘n gesprek met Oudtshoorn
Courant oor sy aanstelling gesê hy sien daarna uit om die gemeenskap van Oudtshoorn te dien en hy het ook gereageer op ‘n vraag oor ‘n hofsaak waarby hy tans betrokke is wat betrekking het op ‘n saak tydens sy aanstelling by die Georgemunisipaliteit.
“Ek weet talle mense is bewus van die hofsaak waarin ek een van vier beskuldigdes is.
“Die provinsie het die klag teen ons aanhangig gemaak. Ek wil die gemeenskap verseker dat ek geen geld gesteel het nie. Daardie geld is vir die regte goed aangewend. Ek vra ook die gemeenskap om in gedagte te hou dat ek onskuldig is tot die hof my skuldig bevind.
“Ek kan presies aan die hof verduidelik wat gebeur het en waarheen die geld is. Noudat die olifant in die spreekwoordelike vertrek aangespreek is, wil ek byvoeg dat my fokus absoluut dienslewering aan die gemeenskap is.”
Teen druktyd Woensdag het die munisipaliteit nog nie gereageer op navrae oor Vrydag se raadsvergadering en die aanstellingsproses nie.