Jeugprojekte gestop ná vandalisme
KROONVALE - Vandale het die Meyer Consulting Resource Centre van alles gestroop en basies net die dop van dié gebou, wat vir gemeenskapsopheffingswerk gebruik word, oorgelos.
Die skobbejakke het alles gesteel of geplunder waarop hulle hul hande kon lê. Skakelaars, ligte, deure, vensters, vloerbedekkings en waterpype is uitgeruk of gebreek. Met dié verfoeilike en vernielsugtige optrede is die opheffingswerk, wat op werklose jongmense gemik is, vir eers gekelder.
Nou het alles plotseling tot stilstand gekom.
Aljone Meyer en haar twee steunpilare, Letoya Kok en Roxanne George, se hande is afgekap om nou met hul jeugprojekte voort te gaan.
Meyer het aan Graaff-Reinet Advertiser gesê hulle sal die gebou, wat as die Child Welfare-gebou in Kroonvale bekendstaan, nou op eie onkoste moet herstel. “Bendelede en tikkoppe het alles wat bruikbaar is gesteel en die res eenvoudig probeer breek. Ons sal alles nou van vooraf moet opbou en self daarvoor betaal. Dis geld wat ek eenvoudig nie het nie.”
Maar, die ergste, sê Meyer, is dat die opleidingsprojekte vir die jeug nie kan voortgaan nie. “Hier is baie werklose jongmense met kundigheid om vorentoe met ons hulp ‘n loopbaan te begin. Dis by die einste sentrum waar ons hulle help om die gepaste kwalifikasies te verwerf wat hul kundigheid sal aanvul. Ons wil hulle hier bemagtig om as waardige lede by die samelewing geïnkorporeer te word. Maar dis nie iets waaraan die afbrekers gedink het nie. Hulle het ‘n klomp jongmense se drome verwoes in stede daarvan om te help bou aan ‘n beter toekoms vir almal.”
Meyer sê Montego het ingespring en vir ‘n paar dae wagte verskaf om die gebou te help oppas en verdere skade te probeer voorkom. “Ons het ook kinders uit die gemeenskap gevra om te help met die wagstanery en vir hulle kos en sakgeld gegee vir hul hulp.”
Montego het ook besluit om ‘n projek aan te pak soortgelyk as dié een wat hulle by Laerskool GraaffReinet van stapel gestuur het. Vir elke leë 2-liter plastiekbottel wat inwoners bymekaarmaak en kom aflewer sal Montego R1 skenk. Só hoop hulle om
R10 000 in kontant te skenk wat vir boumateriaal aangewend kan word om die sentrum weer werkbaar te maak.
Meyer sê die idee is om die gemeenskap aan te moedig om saam te werk om iets te doen om die sentrum te help en nie net geld te gee nie. Montego het voorheen met groot sukses soortgelyke projekte bestuur en tot op datum het hulle al 14 400 bottels uit die gemeenskap verwyder vir herwinning.
Mense wat wil help kan die 2-liter plastiekbottels by Aljone Meyer by Oosstraat 73 in Kroonvale kom aflewer. Enige hulp is welkom en mense kan Aljone ook bel by 066 595 4849.