Goeieman(ne) vier 1ste jaar
ABERDEEN - Aberdeen Safety and Security Services, 'n nie-winsgewende organisasie, het onlangs hul eerste verjaarsdag gevier.
Dié organisasie is op die been gebring deur 'n voormalige soldaat, Dirk Goeieman, en drie vrywilligers om die dorp se strate te patrolleer om misdaad hok te slaan wat begin hand uit ruk het.
Die organisasie het intussen met rasse skrede gegroei en is vandag ‘n 24/7-voetpatrolliediens met 10 patrolleerders wat nou met die plaaslike polisie saamwerk om inwoners en hul besittings veilig te hou. Soos vereis word van vrywillige voetpatrollies, meld patrolleerders aan die begin van elke skof eers by die plaaslike polisiestasie aan.
Omdat ABNSSS, ‘n nie-winsgewende organisasie is, was die begin maar beskeie en ‘n behoorlike uitdaging, maar dit het Goeieman glad nie afgeskrik nie.
Die eerste tweerigtingradios is deur ‘n plaaslike inwoner, Rian Geldenhuys, geskenk. Vandag verskaf ABNSSS self die radios aan belangstellende inwoners vir kommunikasiedoeleindes. So is inwoners deurlopend met ABNSSS in verbinding en patrolleerders kan met mekaar, inwoners en die beheerkamer kommunikeer. Die beheerkamer is in Jacksonstraat en is goedgunstiglik deur die eienaar van die perseel bewillig. Sterk flitsligte en uniforms is ook intussen deur Dowefontein aan ABSSS geskenk.
Volgens Goeieman is een van die grootste bates van die span dat hulle nie net die dorp ken nie, maar veral die dorp se mense. “Buitemaatskappye ken nie die mense nie. ‘n Skelm met ‘n geel hemp aan kan nou hier kwaaddoen en soos hy wegstap, trek hy ‘n rooi baadjie aan en dan word ‘n man met ‘n geel hemp gesoek. Maar ons ken Aberdeen se mense, ons sien gesigte en ons soek die gesig, nie die klere wat die persoon dra nie.”
Die bestuur van ABNSSS voorsien dat hulle in die volgende jaar verder sal groei en uitbrei. Alhoewel die patrollies tans slegs in die dorp aktief is, wil hulle uitbrei om ook Lotusville en Thembalesizwe in te sluit. Daarvoor is finansiële ondersteuning egter nodig. Twee van die doelwitte vir die komende jaar is om ‘n meer formele opleidingstruktuur daar te stel en om PSIRA-geakkrediteer en -geregistreer te wees. Alhoewel PSIRA-akkreditasie nie ‘n voorvereiste vir hierdie patrolliediens is nie, is dit vir ABNSSS se groei tot ‘n formele sekerheidsmaatskappy, ‘n prioriteit.
Oor die opleidingsbeen van die ontwikkelingsplan, sê medestigter
Jacques Ellis: “Op die oomblik verskaf ons informele opleiding. Maar ons wil graag vir veral ons jonger lede formele opleiding bied. Formele opleiding help nie net met selfvertroue nie, maar maak ook loopbaandeure oop.”