‘Dankie Lottoland’ help Hofmeyr
HOFMEYR - Die filmspan van Homebrew Films het onlangs 'n besoek aan Hofmeyr gebring. Groot opgewondenheid het geheers veral toe dit bekend raak dat 'n inwoner, Sanet Coetzer, vir Hofmeyr Hugs of Hope genomineer het as 'n begunstigde by Dankie
Lottoland (TV-program op kykNET wat Suid-Afrikaners in nood te help). Hofmeyr Hugs of Hope is welbekend as opheffingsinstansie deur werkskepping en opleiding, maatskaplike dienste, betrokkenheid by skole en sorg waar nodig.
Casper Bosman, bekende modeontwerper van Bloemfontein, het as gasaanbieder ook in Hofmeyr kom besoek aflê.
Homebrew Films doen gereeld dokumentêre films vir DSTV (kykNET), en dié span het ook inligting ingesamel vir toekomstige gebruik vir kykNET. Die filmspan het in die Victoria Boutique Hotel tuisgegaan waar daar ook onderhoude gevoer is.
Ysige koue en nattigheid het buiteverfilming beïnvloed.
Dié program is die afgelope week gebeeldsend en die speelterrein by
DRC Primêr-skoolterrein het 'n groot tarantula-konstruksie as geskenk van
Dankie Lottoland ontvang wat elke kleuter en leerder se spiertonus, en grootspieren kleinspierontwikkeling sal bevorder. Middellynkruising en driedimensionele ontwikkeling word ook terselfdertyd bevorder. Hierdie speelterrein is opgerig waar honderde kinders elke jaar hul onderrig tot gr. 7 voltooi en waar daar nog nooit enige toerusting was nie. Hofmeyr beskik ook nie oor publieke parke waar kinders kan speel nie.
Hofmeyr Hugs of Hope is ook 'n opleidingsinstansie en het eiendom bekom wat as kleuter- en kindersorghuis ingerig gaan word, asook ‘n jeugontwikkelingsentrum en daar is talle planne op die tafel om verder te groei.
Dankie Lottoland het op groot skaal bygedra tot hierdie voorgenome ontwikkeling met 'n ruim kontantinspuiting van R100 000 met spesifieke verwysing na die kragtoevoer en loodgieterwerk, asook die inrig en herstel van die kombuis en badkamers van Huis Barnard in Du Plessisstraat. Werk het reeds begin.