Gesinsgeweld-inligtingsessie
KANNALAND - Tydens ’n inligtingsessie wat onlangs deur die plaaslike departement van sosiale ontwikkeling se hoof, Marquin Smith gereël is, het ’n groep jongmense die geleentheid gehad om geslagsgeweld ook uit die oogpunt van mans te sien.
Dr. Shanaaz Hoosain, senior lektor by die Universiteit van Kaapstad, het die jongmense vir drie dae vasgenael gehou met haar aanbieding en navorsing hieroor.
Sy het verskeie sleutelbevindinge oor wat geslagsgeweld aktiveer, met die kursusgangers gedeel.
"Mans sien hulself as die persoon wat in die behoeftes van die gesin moet voorsien asook die persoon wat na die veiligheid van die gesin moet omsien, dog is daar steeds mans wat hulself skuldig maak aan vorme van geslagsgeweld. Mans leef nog met die veronderstelling dat hul vrou of lewensmaat ten alle koste hulle klere moet versorg, huistake moet doen en eerbied en respek aan hom moet betoon," het sy gesê. "Die gebruik of misbruik van afhanklikheidsmiddels lei dikwels daartoe dat mans vroue as dislojaal teenoor hulle beskou, veral wanneer vroue ook hul eie beroep uitleef en nie meer die tradisionele rol van huisvrou vervul nie."
Hoosain het die oordrag van hierdie siklus van geslagsgeweld (intergenerasies) aan kursusgangers beklemtoon, maar hulle ook daarop gewys dat dit nie slegs mans is wat die skuldiges is nie, en dat mans ook die slagoffers hiervan kan wees. Hoosain het verduidelik dat mans egter meestal huiwerig is om sulke gevalle te rapporteer, omdat hulle bang is om as swakkelinge beskou te word.
Verder is daar ook die persepsie dat om oor gesinsgeweld openlik te wees, dit tot ’n besprekingspunt by die werkplek sal lei en dus verkies slagoffers om eerder te swyg en die straf te verduur.
Oortuigings soos dat mans alleen besluite kan neem, asook jaloesie, ’n uitgebreide gesin, gebrek aan kommunikasievaardighede of probleemoplossingsvaardighede, is alles bydraende faktore tot geslagsgeweld.
Hoosain bied oplossings:
’n Sterk begroting vir programme wat voorkoming van geslagsgeweld ten doel het.
Kreatiewe skakeling in die gemeenskap om veral oor naweke opbouende aktiwiteite beskikbaar te stel.
Mans moet ingesluit word by beleidmaking - envoorkomingsprogramme. Intervensieprogramme in skole, die werkplek asook plekke van aanbidding.
Meer inligting oor middelafhanklikheid en die gevolge.
Alle rolspelers soos byvoorbeeld polisie, justisie, maatskaplike dienste en gemeenskapsleiers by programme te
betrek.
KANNALAND – ’n Raadsvergadering van Kannalandmunisipaliteit met ’n lywige agenda kon nie Dinsdag plaasvind omdat Icosaen die DA-raadslede nie teenwoordig was nie.
Icosa-president, Jeffrey Donson, het in reaksie hierop gesê dat die Wes-Kaapse minister van plaaslike regering, Anton Bredell, reeds opdrag gegee het dat die waarnemende munisipale bestuurder, Ian Avontuur (ANC-lid), die huidige speaker, Rodge Albertus, moet vervang. Donson sê ook dat Bredell 'n skrywe van Albertus se party, Kannaland Independent Party (KIP), ontvang het dat Albertus deur die party geskors is en gevolglik nie meer die posisie as speaker mag beklee nie.
Volgens Donson is hierdie vergadering onwettig en kan hy nie toelaat dat Icosa aan onwettighede deelneem nie.
KIP het ook in hul skrywe aan Berdell aangedui dat Peter-George Rooi hul voorkeurkandidaat is om Albertus te vervang.