Waterkrises in Dysselsdorp

DYSSELSDORP - Watertoevoerprobleme is onlangs in Dysselsdorp en Bokkraal, veral die hoogliggende areas wat deel van die Groter Oudtshoorn uitmaak, ervaar dit is as gevolg van die konstante kragonderbrekings. Die waterpompstelsel benodig ongeveer 22 uur per dag se elektrisiteit om voldoende water aan die areas te voorsien.

Die Klein-Karoo Landelike Waterskema en Dysselsdorp-areas ontvang water uit boorgate in die omgewing wat deur middel van pompe na opgaardamme gepomp word. Volgens Aurelia Mle, woordvoerder van die Oudtshoorn-munisipaliteit, mag daar slegs water gepomp word volgens die pompe se kapasiteit en wetgewende regulasies. "Die lang periodes van beurtkrag veroorsaak dat die vraag na water die aanbod heeltemal oorskry."

Mle vertel verder dat die situasie Maandag 19 September, vererger is deur die feit dat Eskom 'n fase van sy kragtoevoer in die genoemde areas verloor het.

"Dit het daartoe gelei dat alle pompe en elektronika van die pompe op die waternetwerk nie kon funksioneer nie. Die tye tussen beurtkragperiodes is tans baie kort en gevolglik kan net 'n beperkte hoeveelheid water gepomp en gesuiwer word voordat dit in die stelsel gevoer word."

Die munisipaliteit gebruik tans een tot twee watertrokke om water aan die areas te verskaf en het besef dat dit nie voldoende is nie.

'n Versoek is aan die Tuinroete-distriksmunisipaliteit gestuur vir hulp met bykomende drie tot vier watertrokke om met die situasie in die area te help, terwyl vlak vier en hoër beurtkrag in die land van toepassing is.

Chris Macpherson, burgemeester van Oudtshoorn, doen 'n beroep op inwoners om asseblief water spaarsamig te gebruik en lekkasies onmiddellik aan te meld.