Oudtshoorntaxistaanplek word vasgevat
Die SAPD se onlangse Operasie Fiesta het gelei tot 'n totaal van 144 taxi's wat vir verskeie oortredings en defekte by die Oudtshoorn-taxisstaanplek geïnspekteer is.
Dié operasie is uitgevoer deur lede van die Wes-Kaapse provinsiale speurdiens se kommersiële ondersoekeenheid, Tuinroete-misdaadintelligensie, Oudtshoorn-misdaadvoorkomingseenheid, openbare-orde-polisiëring (Pops) en die departement van vervoer en die provinsiale verkeersdepartement.
Met die uitvoering van die operasie wat op 20 September begin het, is sowat 64 taxi's op die eerste dag vir bedrieglike, duplikaat- en onwettige bedryfspermitte geïnspekteer en 'n totaal van 80 taxi's, die volgende dag.
Benewens die inspeksies wat uitgevoer is, het owerhede beslag gelê op sewe taxi's waarvan drie onpadwaardig. Vier taxi's van die Oos-Kaap is as padwaardig gevind, maar het nie geldige bedryfspermitte vir Oudtshoorn gehad het nie. Hierdie taxi's is daarna geskut en by die SAPD se voertuigstoorfasiliteit gestoor.
Ses verdagtes, wat gearresteer is in verband met die beslagleggings op die taxi's staan tereg op aanklagte van bedrog en korrupsie.
Lede het ook 'n ongedokumenteerde persoon (33) gearresteer omdat hy 'n taxi bestuur het sonder 'n geldige lisensie en bedryfspermit en wat onwettig in die land was. Benewens die beslagleggings het verkeersbeamptes boetes ter waarde van R71 800 uitgereik vir 'n verskeidenheid verkeersoortredings en defekte aan voertuie.
Drie uit die totaal van sewe verdagtes het op Donderdag 22 September in die Oudtshoorn-hof verskyn, terwyl die sake teen die res tydelik teruggetrek is hangende verdere ondersoek.
Die provinsiale kommissaris van die Wes-Kaap, lt.genl. Thembisile Patekile, het die geïntegreerde spanwerk van die betrokkenes geloof en hulle aangemoedig om die res van die ondersoek voort te sit met dieselfde ywer wat hulle tot dusver getoon het.