Aberdeen Toerisme Assosiasie gestig
ABERDEEN - Aberdeen is 'n klein, plattelandse, Karoodorpie, maar een ryk aan erfenis; van die Inqua-stam wat die rykste Khoikhoi-stam in Suidelike Afrika van voor 1689 was tot by die amper hemelhoë NG kerktoring wat vandag nog waak oor die dorp.
Tans het die dorp geen werkende toerisme- óf inligtingskantoor nie. Derhalwe het die Aberdeen Residents and Ratepayers Association (ARRPA) eenparige besluit om die Aberdeen Toerisme Assosiasie (ATA) te stig. ATA se mandaat is om toerisme in Aberdeen te ontwikkel en te bevorder. Die stigtingsvergadering is in Augustus gehou en reeds tydens die September-vergadering is terugvoer gegee oor vordering met 'n opwindende staptoer wat beplan word in die omliggende gebied.
"Ons dorp is bekend en gewild as oornaghalte vir reisigers tussen die binneland en die kus, maar lank nie bekend genoeg as 'n eindbestemming vir toeriste nie. Vir ons dorp se oorlewing en vooruitgang moet ons meer toeriste trek," sê ATA se voorsitter, Jurgens Strydom, wat ook die hoofbeplanner van die beoogde staproete is.