Mediclinic Klein Karoo kry CT-skandeerder

OUDTSHOORN - WESP-radiologie het op 23 Julie 'n CT-skandeerder (rekenaartomografiese skandeerder) by Mediclinic Klein Karoo, as deel van hul uitgebreide dienste, geïnstalleer. Hierdie is 'n nuwe hoofstuk vir Mediclinic Klein Karoo, wat beteken dat pasiënte nie meer na Mediclinic George oorgeplaas hoef te word vir 'n CT-skandering nie. Mediese behandeling van pasiënte kan nou binne minute na hierdie skandering toegepas word. Hierdie nuwe fasiliteit beteken ook dat pasiënte wat simptome van 'n beroerte toon en binne 45 minute vir 'n CT-skandering gaan, moontlik langtermynkomplikasies kan vermy.

Volgens Mikael Coquiller, nuwe praktykbestuurder van WESP-radiologie, is suksesvolle verhoudings, gebaseer op puik diens, oor die afgelope 28 jaar tussen WESP-radiologie en dokters in die Tuinroete, Klein-Karoo en omliggende areas, gebou.

"Ons het so baie versoeke van verskeie dokters in die area, om 'n CT-skandeerder te installeer, ontvang. WESP-radiologie is bly om nou ook hierdie fasiliteit vir hulle te kan voorsien. Die groot aantal CT-skanderings gedurende die eerste ses weke het beslis die behoefte aan die CTskandeerder in Oudtshoorn bevestig.”

Dr. Neels van der Merwe, radioloog by WESP-radiologie, is opgewonde om dié nuwe fasiliteit aan Oudtshoorn se inwoners te bied, en weet dat dit pasiëntesorg in die Klein-Karoo en omliggende areas sal verbeter.

WESP-radiologie in Oudtshoorn verskaf tans die volgende beeldmodaliteite en -prosedures by die toonaangewende radiologiegroep in Oudtshoorn: fluoroskopie, algemene X-straal radiografie, intervensionele radiologie, mammografie en sonars.

Uitgebreide bouwerk by Mediclinic Klein Karoo

Volgens Hannes Stegmann, hospitaalbestuurder van Mediclinic Klein Karoo, word hierdie afdeling van die hospitaal tans vergroot en sal bouwerk in Maart volgende jaar voltooi wees. Die afdeling sal dan met 'n aparte ingang en wagarea spog.

"Daar was 'n groot behoefte vir 'n CTskandeerder in die area en dit is 'n groot aanwins vir die hospitaal."

Foto’s Sonia Wahl Die CT-skandeerder by WESP-Radiologie in Oudtshoorn.

Personeel van WESP-Radiologie in Oudtshoorn, by Mediclinic Klein Karoo. Van links na regs, is: Marinda Bosch (administratief), Leigh-Andrey Draai (algemene assistent), Janine Prins (administrateur), Bianca van Wyngaard (algemene assistent), Chermaine Ingo (administratief), Anthea Taylor (radiograaf), Elisabeth Viviers (radiograaf) en Melisse Le Roux (radiograaf). Heel voor, sittend is, Lonelle Cloete (sonograaf).

Verskeie dokters van Oudtshoorn het by die bekendstelling van die CT-skandeerder meer uitgevind oor die voordele wat dit vir hulle pasiënte inhou. Van links: Mikael Coquiller, nuwe praktykbestuurder van WESP, dr. Neels van der Merwe, radioloog en vennoot van WESP, Hannes Stegmann, Mediclinic-hospitaalbestuurder en dr. Greg Palkowski, internis.