Nuwe besem by Kindersorg
KANNALAND - Kindersorg Ladismith het onlangs ’n nuwe maatskaplike werker, Chanelle Michaels (28), aangestel.
Michaels is egter geen groentjie in haar veld nie. Sy het reeds twee jaar by die ACVV in Riversdal gewerk.
Volgens Michaels, wat haar BA-studies aan die Universiteit van Stellenbosch voltooi het, is die belangrikste kwelpunte wat sy in haar area geïdentifiseer het alkohol, dwelmmisbruik, werkloosheid (veral postCovid-19) asook gesinsprobleme.
"Ons sal nouer met gesinne moet saamwerk en verhoudings tussen die gemeenskap en die kantoor versterk sodat skoolverlating en jeugmisdaad hokgeslaan kan word," sê 'n entoesiastiese Michaels.
Sy het ook bygevoeg dat sy nie sal skroom om in die beste belang van ’n kind by die howe aansoek te doen om ’n verwaarloosde kind in die sorg van goeie pleegouers te plaas nie. Na ’n bepaalde tydperk sal die ouer of ouers weer geassesseer word om vas te stel of hulle sodanig gerehabiliteer het om hul kind weer terug in hul sorg te kry. Sy beoog ook om binnekort saam met Marquin Smith, maatskaplike werker van die departement sosiale dienste, en selfs die plaaslike landdros, Dmitri Mitchell, ’n werksessie in kinderwetopleiding aan te bied sodat "die gemeenskap die erns van hierdie saak kan besef en die kantoor glad nie as ’n bedreiging moet beskou nie," het Michaels benadruk.