Rooi haal SWD-rugbyspan
ZOAR - Charles Rooi, gr.7-leerder verbonde aan Laerskool RP Botha op Zoar speel tans die rugbyveld rooiwarm. Rooi is gekies om SWD se o.13-span by die jaarlikse Cravenweek te verteenwoordig.
Die groep het op Saterdag 24 September 2022 by die Hoërskool Outeniqua saamgetrek vir ‘n oefensessie en het later die middag tydens ‘n pettefunksie hul kleure ontvang.
Die spelers is tans besig met voorbereiding vir die nasionale toernooi wat op 29 September tot 1 Oktober in Bloemfontein plaasvind.
Rooi het ook reeds tydens die Junievakansie aan ‘n toernooi te Krugersdorp deelgeneem waar hy behoorlik die velde aan die brand gespeel het. Ralph Michaels, hoofafrigter van die span, is in sy noppies en noem trots dat Rooi tans ‘n opwindende tydperk in sy bloedjonk rugbyloopbaan beleef.
“Hy kan die spel lees en beskik ook oor ‘n gevaarlike aftrap wat sy teenstanders altyd aan die raai het.”
Charles se pa, Jerrit Rooi, het aan die Oudtshoorn Courant bevestig dat sy seun deur Hoërskool Monument in Gauteng genader is om daar skool te gaan. “Ons het egter nog nie ‘n besluit geneem nie.”