Erfenisfees op hoë noot afgesluit
Jonathan Robain, en sy koortjieorkes het die dinge Sondagaand op die Bridgtonsportterrein behoorlik laat ruk met honderde Oudtshoorniete wat opgeruk het vir die afsluiting van die Oudtshoorn Christelike Jeugforum (OCJF) se 2022 Erfenisfees.
“Dit was ons grootste erfenisfees in die forum se bestaan van 12 jaar,” sê die projekbestuurder, Phillip Seroux. Die fees kon as gevolg van Covid vir twee jaar nie aangebied word nie.
Volgens Seroux was die enigste ongelukkigheid van die fees die kansellering van die Rockets se konsert Saterdagaand omdat die groep eers teen 23:30 Saterdagaand in Oudtshoorn aangekom het na ‘n vertoning vroeër die dag in Grabouw.
“Ons het ‘n verlies van R75 000 gelei en vra die gemeenskap van Oudtshoorn om verskoning. Dit was buite ons beheer en ons is baie jammer daaroor. Ons moes die mense wat kaartjies gekoop het se geld teruggee,” het Seroux gesê.
Die fees het Vrydagmiddag afgeskop met sportaktiwiteite soos netbal, sokker, skaak, dominoes, sewesrugby en inheemse speletjies.
Saterdag se verrigtinge het vroegoggend begin met ‘n optog teen dwelms, drankmisbruik, bendebedrywighede, tienerswangerskappe en misdaad vanaf Smartie Town tot by die sportterrein met verskeie geestelike leiers aan die voorpunt.
Die fees is daarna amptelik deur die uitvoerende burgemeester van Oudtshoorn, Chris Macpherson, geopen.
“Ons moenie op Erfenisdag net die verlede herdenk nie, maar ook onthou dat ons ‘n plig het om dit wat vir ons nagelaat is te bewaar en te onderhou. Ons moet ook onthou dat wat ons nou doen die erfenis vir ons kinders en hul kinders sal bepaal.”
Volgens die burgemeester is erfenis ook die natuur rondom ons en spesiale plekke soos die Kangogrotte wat ‘n wêrelderfenisterrein is. Dit is deel van ons almal se erfenis en ons moet dit bewaar en daarna omsien,” het Macpherson gesê.
Die forum het ook ‘n versoekskrif aan die verteenwoordigers van die SAPD oorhandig waarin ondermeer gevra word vir strenger optrede teen onwettige sjebiens en dwelmsmouse.
Die fees is Sondagoggend voortgesit met ‘n spesiale kerkdiens waar Apostel Vincent Alexander van Kaapstad as gasprediker opgetree het en later die aand afgesluit met Jonathan Robain en sy koortjieorkes.
“Dit was ‘n reuse, reuse, reusesukses,” sê Seroux.
Die Oudtshoorn Christelike Jeugforum is volgens Seroux op 31 Julie 2010 onder ‘n boom by die Christen Herlewing Kerk in Bridgton gestig met die doel dat die verskillende jeugtakke in die Groter Oudtshoorn moet verenig en die jeug werkbare oplossings kry vir hul probleme met programme in die gemeenskap om dwelmmisbruik, tienerswangerskappe tienermisdaad, bende aktiwiteite, die probleem met straatkinders en MIV/Vigs aan te spreek.
Die forum is volgens die hoof- uitvoerende beampte, Johnny Baartman, baie trots op wat hulle die afgelope twaalf jaar in die gemeenskap gedoen het.
Die OCJF bied regdeur die jaar projekte vir die jeug aan en mense wat die forum wil ondersteun kan vir Phillip Seroux by 079 987 9486 of Johnny Baartman by 062 106 1904 skakel.