Hoërskool Oudtshoorn hou fees en sportdag
Hoërskool Oudtshoorn het die afgelope naweek 'n skolesportdag gehou wat rugby, netbal en hokkie ingesluit het.
Struisies se o. 19 A-rugbyspan het teen hul eweknie van Hoërskool Protea gespeel en met 27 - 12 geseëvier. Struisies se o. 19B-span was baas met 18 - 15 teen Hoërskool Protea se B-span. Albei hierdie wedstryde is proewe vir Struisies se o.19A- en B-rugbyspanne vir 2023.
Old Boys, Hokkie- en Netbal-bokkies
Die Old Boys-rugbyspan en die Hokkieen Netbal-bokkies het mekaar Saterdag gepak met altesaam 46 Old Boys-spelers wat deelgeneem het. Karoo Lusern het teen Klein Karoo Saadproduksie gespeel en die speler van dié wedstryd was, Willem Jafhta, wat tydens die wedstryd blitsvinnig van die kwartlyn, regdeur sy opponente 'n drie agter die doellyn gedruk het.
Die Old Boys-wedstryd is deur 'n groot skare ondersteun. Makka Swart wat aan al drie die sportkodes deelgeneem het, was as Oudtshoorn-rugbyklub se Grootvoël
sportman van die dag aangewys.
Grootvoël-boeremusiekfees
Die tiende Grootvoël-boeremusiekfees is op 23 en 24 September in Hoërskool Oudtshoorn se saal gehou. Voete kieliemusiek is oor dié twee dae deur nege orkeste gespeel. Hierdie fees bestaan al sedert 2012 en volgens Willem Marais, hooforganiseerder van die fees, was daar meer as 400 kaartjies vir die Vrydagaand verkoop.
"Ons het teen Vrydagoggend al 240 kaartjies aanlyn verkoop - voor enige verrigtinge nog plaasgevind het. Op Saterdagmiddag, voor die rugbywedstryd, was daar omtrent 500 feesgangers in Hoërskool Oudtshoorn se skoolsaal."
Marais vertel dat senior spelers soos, Allen Green (90) en Johan Burger, ook oor die naweek musiek gemaak het.
"Ons beplan om weer volgende jaar die Grootvoël-boeremusiekfees oor Erfenisnaweek te hou. Hoërskool Oudtshoorn het klaar ingestem dat die fees weer in hulle skoolsaal gehou kan word," het Marais bevestig.