Vroue met vlytige vingers
BURGERSDORP - 'n Groep vroue van Steynsburg, Burgersdorp, AliwalNoord, Molteno en Hofmeyr het onlangs in Burgersdorp bymekaargekom om die Slow Stitching-kursus by te woon. Volgens Almarie Meiring van Crazy Crafters is die kursus deur Lizl Peyper aangebied.
"Saterdagoggend was die opleidingslokaal by Crazy Crafters tjokkenblok vol met kreatiewe vroue wat dié tegniek kom leer en baasgeraak het," vertel sy.
Slow Stitching is wanneer daar kuns geskep word met naald en garing, presies soos 'n skildery met verf, ink en kwaste gevorm word. Die Afrikaanse term vir die kunsvorm is nie bekend nie, maar die groep in Burgersdorp noem hul kunsvorm Stik-'ie-Stukkie.
Handstikwerk skep die mooiste, gedetailleerde kunsartikels en nie een is ooit 'n duplikaat van die volgende nie. Kunstenaars het geen kreatiewe agtergrond nodig nie en daar is altyd meer as genoeg voorbeelde wat gevolg kan word.
"Ek versamel al linte, krale, kantjies, knope en talle lapflentertjies en borduurgare vir baie jare. Met hierdie kunsvorm benut ek elke flentertjie en die voltooide artikel is soms vir myself 'n groot verrassing," deel Peyper mee.
"Elke persoon se eindproduk weerspieël haar eie smaak en die besige koppe het besige prente terwyl die rustiger vroue se kuns baie kalmerend is. Die belangrikste is dat elkeen geniet wat sy maak en dat dit vir haar mooi is."