Kliniekdag vir diere ‘n reusesukses
HOFMEYR - Hofmeyr Hugs of Hope, in samewerking met die staatsveearts van Cradock hou een keer 'n maand 'n suksesvolle kliniekdag by die Chris Hanigemeenskapslokaal. Die maand s'n was weer 'n reusesukses.
Lin Opperman, van Hofmeyr Hugs of Hope, wat die klinieke organiseer, sê dit is net altyd moeilik om die boodskap dat die dierekliniek op pad is, by troeteldiereienaars te kry.
"Ek maak op groot skaal van sosiale media gebruik en ek ry die dag voor die kliniek kom op en af in die strate om diere-eienaars uit te nooi. Dr. Magodi, staatsveearts van Cradock, is altyd gewillig om een maal per maand na Hofmeyr te reis, waar die kliniek op die terrein van die Chris Hanigemeenskapslokaal ingerig word."
Sy sê dit was vir hulle 'n wonderlike ervaring om die maand talle leerders by die kliniek te ontvang, met hul goed versorgde diere.
"Van vroegoggend het hulle in toue aangestap om in 'n lang ry te sit, sodat troeteldiere behandel kon word teen vlooie, luise en bosluise. Wurmmedikasie, wondbehandelings en selfs kankerbehandelings en roetine ondersoeke word gedoen. Soms is die honde-eienaar banger vir die inspuiting as die troeteldier self. Ongelukkig is daar steeds troeteldiereienaars wat nie van dié geleentheid gebruik maak nie."