Burgemeester besoek die Blossoms-noodwaterprojek

OUDTSHOORN - Die uitvoerende burgemeester van die Groter Oudtshoorn, Chris Macpherson, het verlede week die Blossoms-waterprojek besoek om die vordering vas te stel. Werk aan die sowat 22 km-pyplyn om water aan Oudtshoorn te voorsien, vorder vinnig en teen verlede week, was 11 km reeds gelê.

Chris Swart, senior bestuurder van die munisipaliteit se water en rioolafdeling, het Macpherson na verskillende punte van die projek vergesel. Hulle het die hoofboorgat van die Blossoms-projek besoek vanwaar water teen 40 liter per sekonde vrygelaat sal word na voltooiing van die eerste fase van die projek.

Alhoewel die druk by die boorgat hoog genoeg is om water vrylik te laat uitvloei, word 'n pomp by die gat opgestel om water na 'n aanjaagpompstasie 1,5 km verder te laat vloei.

Vanaf die aanjaagpompstasie word water oor 2,36 km na 'n reservoir op 'n heuwel gevoer. Vanaf die reservoir sal water deur swaartekrag na net buite Oudtshoorn vloei waar 'n gedeelte vir die landelike waterskema herlei word. Die burgemeester se laaste punt van die besoek was die terrein waar die kontrakteur tans besig is met uitgrawings om die 315 mm-pyp te lê.

Volgens die kontrakteur is hulle ondanks 'n baie klipperige gedeelte, steeds binne die beplande tydsraamwerk. Daar word verwag dat die eerste fase teen Maart 2023 voltooi sal wees en dat water teen April 2023 deur die pypleiding voorsien sal word.

Macpherson het gesê dat besoeke aan verskillende munisipale projekte vir hom uiters belangrik is aangesien dit hom toelaat om persoonlik te sien wat op grondvlak gebeur.

"Ek is trots op wat reeds bereik is met die Blossoms-projek. Dit bevestig ook ons verbintenis om dringende kwessies soos watervoorsiening aktief aan te spreek en op te los," het hy gesê.