Splinternuwe huise word oorhandig
DYSSELSDORP - Die Wes-Kaapse minister van infrastruktuur, Tertuis Simmers, het verlede week, saam met burgemeester Chris Macpherson en die burgemeester van die Tuinroetedistriksmunisipaliteit, Memory Booysen, 12 nuwe huise aan eienaars oorhandig.
Volgens Aurelia Mle, woordvoerder van die Oudtshoorn-munisipaliteit, is die amptelike bekendstelling vir die behuisingsprojek in Dysselsdorp op 14 Oktober verlede jaar gedoen.
Simmers het toe die sooispitseremonie gelei.
"Sedert Oktober 2021 is 133 huise aan nuwe huiseienaars oorhandig. Dit sluit verlede week se 12 huise in," sê Mle.
Tydens die projek sal daar 522 huise in fases gebou word. Fase 1, wat uit 150 huise bestaan, is byna voltooi. In die tweede fase sal 237 huise gebou word en in die laaste fase sal 135 huise gebou word. Die projek behoort in 2023/2024 voltooi te wees.
Liluth van Rooyen, raadslid van wyk 10, het tydens haar verwelkomingstoespraak gesê dat alle nuwe huiseienaars dit as 'n voorreg moet sien om deel te wees van die
Dysselsdorp-behuisingsprojek.
"Julle is bevoorreg om die pragtige huise te kan ontvang. Kyk asseblief na julle huise," het sy gesê.
Macpherson was ewe opgewonde oor die nuwe huise wat oorhandig is. Hy het Simmers en Booysen bedank vir die geleentheid wat vir Dysselsdorp geskep is.
Booysen het gesê dat daar, na konsultasie met Simmers, besluit is dat distrikmunisipaliteite by behuisingsprojekte betrokke sal wees. Die Tuinroetedistriksmunisipaliteit is die eerste distrik in Suid-Afrika wat so 'n projek aanpak.
Simmers het die huiseienaars aangemoedig om na hul wonings om te sien.
"Die gemeenskap van Dysselsdorp het 27 jaar gewag vir huise. Dit is dus 'n voorreg om hier te staan en die sleutels te oorhandig. Inwoners moet die nuwe gemeenskap met die regte waardes opbou en mekaar met liefde en respek behandel."
Cillia September, 'n 60-jarige vrou, het 22 jaar gewag vir 'n huis van haar eie. Sy was in trane toe Simmers die sleutels van haar huis aan haar oorhandig.