Aksiekomitee teen alkoholen dwelmmisbruik gestig
LADISMITH - Verskeie rolspelers in Kannaland, waaronder die munisipaliteit, polisie, verteenwoordigers van die WesKaapse onderwysdepartement, justisie en die departement van sosiale ontwikkeling het verlede Donderdag in Ladismith bymekaargekom om ’n aksiekomitee teen alkohol- en dwelmmisbruik op die been te bring.
Nicholas Valentyn, burgemeester van die Kannaland-munisipaliteit, het die werksessie geopen. Volgens hom moet die rolspelers aan die Wes-Kaapse regering rapporteer rakende die vordering en modus operandi van die komitee.
In sy toespraak het Valentyn gesê dat die tyd vir praat verby is en vennootskappe gevorm moet word.
"Dwelmbase kan nie die platteland kom oorneem en gevange hou nie. Dankie aan almal teenwoordig, ons gaan as oorwinnaars uit hierdie stryd tree."
Hy het verder gesê dat die vennootskap met die polisie baie belangrik is.
Chantelle Pepper van die departement sosiale ontwikkeling het die wetlikheid van die komitee verduidelik en ook na soortgelyke komitees in Hessequa en die Tuinroete verwys wat al funksioneer.
"Kom ons voorkom dat ons kinders misdadigers word, kom ons bou aan die kernstruktuur van ’n gemeenskap. Gee die gemeenskap vertroue in hierdie Dwelmaksie Groep wat vandag hier gebore word," het Marquin Smith, ook van die departement sosiale ontwikkeling gesê.