Skills Academy skep nuwe hoop
OUDTSHOORN - “Met hierdie akademie wil ek hoop skep vir ons mense wat so heeldag op die hoeke van strate sit en ledig is.” So het Jerome Opperman Woensdagoggend gesê by die opening van sy New Skills Academy Institute of Excellence-opleidingskollege in Tabakstraat 7 (industriële area) waar geakkrediteerde kursusse van so hoog as NQF 4 voortaan aangebied sal word.
Altesaam 35 ywerige leerders het Woensdagoggend (gister) aangetree vir hul eerste kursus (gratis) by die Akademie; die eerste tree na die begin van eindelose werksmoontlikhede in die toekoms. Die akademie is ook in vennootskap met Kaybeez Development Projects.
Die kursusse, wat toeganklik is vir Jan Publiek, sluit in Occupational Health and Safety, Welding Science, Firefighting, Safety Supervision and Leadership, Oil and Gas Safety Management en selfs ingenieurskursusse om slegs 'n paar te noem.
"Dis algemene kennis dat kwaliteit geleerdheid peperduur is vir die gewone ou op straat en in hierdie verband voel ons dat daar iewers 'n begin gemaak moet word, al is dit wat ons nou doen, slegs 'n druppel in die emmer. Ons is egter druk besig agter die skerms om selfs nog meer borge en geld te bekom om hierdie lewensveranderende inisiatief te finansier en ook om die kursusse bekostigbaar te maak."
Opperman vertel dat sy akademie onlangs twee voormalige plaaslike gevangenes suksesvol opgelei het om op die oliebore in Qatar te gaan werk.
"Ek myself werk reeds vir die afgelope 15 jaar op die oliebore en ek en my span beoog om weer ons kontakte in Indonesië en Dubai op te bou om sodoende die Akademie in terme van internasionale werksgeleenthede, van krag tot krag te laat groei," het 'n opgewonde Opperman vertel.
Vir enige inligting rakende die kursusse en pryse, kontak Opperman by 076 078 2238 of e-pos by jerome@ newskillsacademy.org.za.