‘Lapdag’ herleef by 23ste Vollie-reünie
OUDTSHOORN - Die 23ste reünie van Vollies, oudstudente van die destydse Onderwyskollege Suid-Kaapland
(OKSK), wat die afgelope naweek hier gehou is en deur meer as 200 Vollies bygewoon is, was geskiedkundig in meer as een opsig.
Behalwe vir die feit dat ‘n voormalige rektor en ‘n hele aantal ouddosente die reünie bygewoon het, én die kollege vanjaar sy 70ste verjaarsdag sou vier, was daar Sondag weer ‘n Lapdag-seremonie. Lapdag was die dag wanneer tweedejaarstudente hul kleurbaadjies, bekend as ‘Die Lap’ gekry het.
Dit was die eerste keer sedert die sluiting van die kollege in 1996 dat daar weer ‘n Lap-oorhandigingseremonie plaasgevind het.
Die kollege het sy deure in 1952 in twee klaskamers van De Villiers Primêr geopen en is in 1996 deur die staat gesluit.
Volgens die reëlingskomitee van die reünie is spesiale moeite gedoen om iemand te vind om die materiaal vir die kleurbaadjies in die hande te kry. Drie en dertig kleurbaadjies is gemaak vir Vollies wat dit bestel het.
Die voorlaaste rektor van die kollege, Reggy Kleintjies, het tydens Sondag se die tradisionele dankseggingsdiens in die Bridgton Verenigende Gereformeerde
Kerk, die baadjies oorhandig en ook sy dank uitgespreek vir die uitnodiging en die komitee gelukgewens met die puik reëlings.
Tydens nog ’n emosionele oomblik het Rumdulary Tait, weduwee van wyle Lionel Tait, laaste rektor van die kollege, sy rektorstoga aan die reüniekomitee oorhandig vir uitstalling in die spesiale Vollie-museum in die CP Nel-museum. Lionel Tait was van 1982 tot 1996 rektor van die kollege.
Tydens nog ‘n gewyde oomblik is die name van Vollies wat sedert die laaste reünie in 2019 gesterf het gelees, ‘n kers aangesteek en ‘n krans gelê.