Golden Oldies maak klaar op tandemfiets
OUDTSHOORN - Toe twee deelnemers nie meer aan die fietswedren, Ride the Karoo, tussen 23 en 25 September kon deelneem nie, was Elbé (70) en John (73) Kruyt, eienaars van United Paints and
Pool, se name volgende op die waglys om aan die wedren deel te neem. Dié wedren het Vrydagaand om 19:00 op die plaas Dwarsvlei, naby Middelburg weggespring. Hulle het die 141 km wat oor drie dae opgedeel was, met 'n tandemfiets voltooi.
Elbé en John is ywerige fietsryers en ervare stappers wat al 120 km in die Naukluftwoestyn in Namibië afgelê het, en voeg Elbé by dat dit met 'n swaar rugsak was. Elbé sê dat hulle baie opgewonde was oor die Ride the Karoo-wedren en dat die snaaksste ding vir haar wat hulle moes saamneem, oorpluisies was.
"Seker maar om die gesnork van 320 fietsryers te demp, want die tentjies waarin ons geslaap het, het teen mekaar gestaan."
Vrydagaand met die eerste skof van 20 km, was ons "gewapen" met fiets- en kopligte, vertel Elbé.
“Daar was net ou voetslaanpaaie en nuwe paadjies wat met ‘n plaasimplement gemaak is, sonder veel sukses. Dit was uiters tegnies en jy veg om bo-op die fiets te bly."
Die Saterdag het hulle 76 km met 'n klim van 660 m afgelê. Volgens Elbé was daar vyfsterwaterpunte op die skof met die lekkerste koeksisters, dadelbolletjies, lemoenskywe, Coke en water.
Die Sondag was daar 48 km om af te lê en vertel sy dat hulle gedink het dat dit sommer gou sou gaan. “Hier sluk ons die grootste wind nog ooit en ons klim 520 m met sig-sag-paaie wat net ervare ryers kon ry. Ons het soos 'n ry miere op en af teen die berg geloop.”
Dit was by die volgende waterpunt wat hulle die eerste keer gehoor het dat dag drie die moeilikste roete van die Ride the Karoo is.
Met die prysuitdeling het Elbé en John die Golden Oldies-toekenning ontvang en volgens haar is almal verbaas dat hulle dit nog boonop op 'n tandemfiets voltooi het, sonder om een keer te val.
"Streng gesproke weet niemand, en nie eens ons twee, hoe ons dit reggekry het nie, but we did it."