Inwoners raadop met watertoevoer en hoë waterrekeninge

ABERDEEN - Inwoners is raadop met die gebrek aan watertoevoer in die dorp.

"Ek noteer elke dag wat ons sukkel met water. Van 1 tot 9 Oktober was daar nie een dag ordentlik lopende water in ons krane nie," sê een van die inwoners.

Aberdeen se watertoevoer is afhanklik van pompe wat water uit boorgate in tenks pomp. Nie net is die kapasiteit uiters beperk nie, maar die pompe skakel af wanneer daar geen elektrisiteit is nie. Dan moet dit later fisies weer aangeskakel word. Tydens beurtkrag werk die pompe nie en moet dan telkens ná beurtkrag weer aangeskakel word. Dikwels word dit eers ure ná beurtkrag aangeskakel. Teen daardie tyd het die tenks reeds leeggeloop.

"Maar selfs met geen beurtkrag nie, droog die krane ook op soos hierdie afgelope naweek weer," sê gefrustreerde inwoners.

Verskeie Aberdeners loop ook deur onder hoë maandelikse waterrekeninge. Een eienaar het een maand 'n rekening vir 120 kℓ watergebruik ontvang en die volgende maand vir 85 kℓ.

Clive Kombani, plaaslike munisipaleareabestuurder, het op navraag aan Graaff-Reinet Advertiser bevestig dat die uitgangspunt inderdaad is dat watermeters akkuraat is en daarom moet verbruikers wat beweer meterlesings is foutief, dit bewys.

"Ons meters is reg, maar as iemand reken dit is nie, moet hulle dit aanmeld.

Ons verwyder dan die meter en toets dit. Indien dit egter toets as akkuraat, moet die verbruiker dan die koste vereffen om die meter uit te haal en te toets. As dit foutief is, vervang ons dit," sê Kombani.

Nog 'n inwoner is onlangs vir 24 kℓ water se gebruik gefaktureer. Volgens haar kon sy onmoontlik daardie hoeveelheid water gebruik. Omdat sy bewus is dat daar dikwels meer lug as water in die pype is, het sy videomateriaal geneem van die effek wat die swak watertoevoer op die meter het.

In die video blaas lug deur die pyp met afwisselende storting van spoegsels water so tussendeur, terwyl die meter teen verstommende spoed draai.

Kombani se reaksie hierop was dat hy bewus is van die probleem met lug in die waterpype, maar dat die munisipaliteit se tegniese span hom verseker het dat die watermeters slegs water meet, nie lug nie. "Die meters is sodanig vervaardig en gekalibreer dat dit stilstaan wanneer lug deur die pyp beweeg. Slegs as daar water deurgaan, loop die meter. Inwoners wat buitensporige waterrekeninge ontvang of probleme met watertoevoer ervaar moet dit by die munisipaliteit aanmeld sodat dit ondersoek kan word," het Kombani gesê.